Vawiin khan MIRSAC Office, Chaltlang-ah Rajiv Gandhi National Drinking Water Mission hnuaia hmalakna pakhat, lei hnuaia tui awm zawnna (Ground water prospect) map (Hard and Soft copy) chu MIRSAC Project Director Dr. R.K. Lallianthanga chuan PHE hotute hnenah an lo hman tangkai turin a hlan.
He map hlannaah hian Mizoram Remote Sensing Application Centre (MIRSAC) Project Director chuan, ‘Rajiv Gandhi National Drinking Water Mission hnuaiah hian Ground water prospect mapping bakah water quality zir chianna neih a ni a, he hna hi Ministry of Drinking Water and Sanitation-in sum leh pai tumin National Remote Sensing Centre, Dept. of Space bul tuma kalpui a ni a. India ram pumpuiah state hrang hrangte a tahtawla kalpuiin Mizoram tan MIRSAC-in he hna hi a thawk a, kan state tan lei hnuai tui awmna map hi siamin a hun taka kan zo thei ta hi kan lawm hle a ni, a ti a. India rama thingtlang khua zaa 90 (90%) leh khawpui zaa 30 (30%) te hian lei hnuai tui hi in atan an hmang a, buh leh bal chawmna atana tui an hman zaa 60 (60%) lai hi lei hnuai tui lak chhuah a ni a. Vanneihthlak takin Mizoram chuan ruah tui kan dawng tha a, lui leh tuikhur tui te nen tangkawpin kan mamawh eng emaw chen chu min la phuhruk a. Amaherawhchu, mihring pung chho zel leh khawpui thang zel avangin lei hnuai tui kan mamawhna hi a sang zel dawn a, Mizoramah pawh lei pawn langa kan tui neihte hian min daih reng seng dawn lova, lei hnuai tui inkhawl khawm te hi kan hman tangkai chhoh zel a tul dawn a ni, MIRSAC Project Director chuan a ti.
He hunah hian Pu F. Lalramchuana, Senior Scientific Officer, MIRSAC chuan Rajiv Gandhi National Drinking Water Mission hnuaia Ground water prospect map an siam chhuah dan power point presentation hmangin a entir a. Lei hnuai tui awm thatna hmun zawn nan hian a ram pian hmang te, hmun awih leh zawl dan te bakah leilung awm dan (geological structure) hrang hrang zir chian phawt a ni a. Satellite thlalak te, Survey of India toposheet te, Mizoram PHE in data an lo neih tawh atangte leh MIRSAC-in data a siam chhuah hmang te a zir chianna hi kalpui a nih thu a sawi a. Hemi atang hian Mizoramah lei hnuai tui awm thatna indawt class 10 hmuh chhuah a nih thu te sawiin Map hman dan tur te a sawi fiah nghal bawk.
Mizoram Ground water prospect map ah hian Mizorama khua zawng zawng bakah an tuikhur te, tui chhunchhuah te leh lei hnuai tui lak chhuahna - hand pump awmna te, lui lian leh lui te te tih lan vek a ni a. Lui hnara tui a awm that theihna atana tui khuah (recharge structure) chi hrang hrang- check dam, nala bund, recharge pit te leh storage tank te siamna tur hmun remchang te pawh he map ah hian tarlan a ni bawk.
He map hi PHE SE & Director CCDU Pu Lalrothanga’n a dawng a. Thu sawiin PHE CCDU Director chuan, MIRSAC in hetiang map tha leh rintlak, Remote Sensing leh GIS thiamna hmanga an buatsaih thei hi a lawmawm hle a. Hei hian lei hnuai tuite lakchhuahna kawngah nasa taka a puih tur thu leh Mizoram tan pawh a tangkai hle dawn a ni a ti.
He Map hlannaah hian PHE Department atangin Pu Lalruatkima, Hydrogeologist leh Lalbiakmawia, Chief Chemist te an tel a, MIRSAC atangin Officer te leh an Scientist ten an tawiawm bawk a ni.
