2692/2025-2026

Champhai, dated 16th December 2025: Mizoram Information Service (MIS) Officer 2025 batch te chuan nimin khan Champhai District lo thlengin Information & Public Relations (I&PR) Department hnuaia district-a hnathawh dan leh kalhmang zir turin office hrang hrang an tlawh.

MIS Officer 2025 batch te hi mi 3 - Pi Teresa Vanmalsawmi, Pu R. Vanneihtluanga leh Pi Lalchungnungi Lakher te niin I&PR Directorate-ah IPRO in an awm mek a, district-a hnathawh dan leh office dang nena thawhho dan zirin Champhai DIPRO Pu Lalzara hovin DC Office, SP Office leh DIPRO Office te an tlawh a ni. DC Office-ah hian SDO (Sadar) Pu Chandrakant Bagoria chuan lo kawmin DC Office hnathawh hrang hrang te a lo sawi a, an zawhna te a chhan sak. SP Office-ah hian Champhai SP Pu Lokeshwaran R chuan lo kawmin SP Office hnathawh hrang hrang, border district an nihna anga an hnathawh tam bik te, Champhai district chungchang te a lo sawipui a, tha taka hna thawka ram tana mi hmantlak ni turin a fuih bawk.

DIPRO Office-ah hian DIPRO Pu Lalzara chuan district-a I&PR hnathawh dan hrang hrang - press release buaipui dan te, office dang nena thawhho dan te, inthlan lai DIPRO mawhphurhna te, media relations leh publicity tha neih dan te leh office-a file hrang hrang kal dan te a lo sawipui.

Inzirna hun hlawkthlak tak an hman hnuah MIS Officer te hi vawiin khan Aizawlah an let leh a ni.