Vawiin chawhnu khan Administrative Training Institute (ATI) Conference Hall-ah Mizoram Information Service (MIS) Probationer, Foundation Training zote thlahna hun, Valediction Programme hman a ni a, Information & Public Relations Department Secretary Pu B. Lalthanliana chu khuallian niin Training chhuak tharte hnenah Certificate a hlan a ni.

Khuallian, Information & Public Relations Department Secretary Pu B. Lalthanliana chuan ATI in MIS Probation (2016)-te puala Combined Foundation Training a buatsaih theih avangin lawmthu a sawi a. Rorelna dik taka kalpui tura training neih tangkaina sawiin Khuallian chuan, “Mi hmantlak, sawrkar tana mi tangkai, hotute rin hlawh mi ni tur chuan dan leh hrai hriat tam a tul a, thil hre tam na na na chu an huaisen a, kawng tinrengah confidence an nei a, mi rawnkai an ni nge nge thin,” a ti a. MCS leh MIS Probationer-te chu training-naa an thil zir leh hriatte a hun taka hmang tangkai tura chahin khuallian chuan, mipuiten an chanvo dik tak an hmuh theih nante, tanpui ngai dik takten tanpuina an dawn theih nante leh sawrkar tana mi tangkai ni theuh turin Probationer zawng zawngte duhsakna a hlan bawk.

He Valedictory Programme hi ATI Joint Director leh Course Coordinator ni bawk, Pi Angela Zothanpuii, MCS chuan a kaihruaiin Training kalpui dan tlangpui a report a. Trainee-te atangin training an hlawkpui dan ngaithlak a ni bawk. ATI Director Pi Ramdinliani, MCS chuan lawmthu sawiin hun a khar a ni.

Tun tum Foundation Training hi MCS Probationer 10 leh MIS Probationer 4 te tan ATI hian April ni 1 atangin a buatsaih a. MCS Probationer-te hian thla 3 dang training an la neih chhunzawn ve thung dawn a ni.