495/2026-2027

Aizawl, 13 May 2026: Vawiin khan Planning & Programme Implementation Department Conference Hall-ah UD&PA Minister Pu K. Sapdanga’n UD&PA hmalakna thar ‘Mission Urban Drain' a tlangzarh. He mission thil tum ber chu Aizawl khawpui hriselna, thianghlimna leh himna tura tui luankawr ( Drain) mumal zawk siam a ni.

Tlangzarhna inkhawmah hian Pu K. Sapdanga chuan Aizawl khawpui chu tlang chhengchhe taka awm a nih avangin kum tin leimin leh leitawlh kan tuar nasa thin a, hei hi tui luankawr mumal kan neih loh vang a ni, a ti a. "Kan drain neihchhunte hi hmun tam takah bawlhhlawhin a hnawh a, ruahtui a tlak hmasaka tuihawk lo luangliam hian khawlai a tibawlhhlawh thin bawk a ni," a ti.

Minister chuan Mission Urban Drain-in a tum ber chu khawpui himna, thianghlimna leh hriselna a ni a, hemi tihhlawhtlinna atan hian kum 7 chhunga Aizawl khawpui tuam chhuak vek tui luan kawr mumal tak siam tum a nih thu a sawi.He mission hlawhtlinna tur hian UD&PA, DM&R, AMC Corporators-te inkarah thawhhona tha tak a awm a pawimawh thu a sawi a. Minister chuan Local Council, tlawmngai pawl leh mipuite chu mahni veng theuhva tui luan kawr vawng thianghlim tur leh he hna hi kuttling lova thawk lo turin a chah a ni.

Pu Jacob Lalawmpuia, Director,UD&PA chuan Mission Urban Drain hmalakna tur te a sawifiah a,chungte chu:

1) Tui Luan Kawr Thlunzawmna: Khawpui chhunga tui luan kawr awm tawh sa, hmun hrang hranga thlun zawm loh (missing links) mumal taka thlun zawm vek tura ruahman a ni.

2) Three-Tier Classification: Tui luan kawrte hi chi thumah then an ni a—Primary (Storm Drain lian), Secondary (Ward-level link drains), leh Tertiary (In bulhnaia tui luan kawr tenau) te a ni.

3) RCC-a siam leh Footpath: Tui luan kawr thar siam turte hi RCC-a siam tur niin, a remchanna hmun apiangah RCC-a khuh (cover) a ni ang a, hei hian mihring kalna (pedestrian footpath) tha tak a siam dawn bakah chetsualna lakah a veng dawn a ni.

4) Scientific Planning : GIS-based mapping hmangin Aizawl khawpui hmun hrang hranga tui luanna turte uluk taka zirchian (survey) hnuah hna hi thawh a ni ang.

Mission Urban Drain hi kum 2033 a zawhfel tura inruahman phawt a ni a, khawpui chhunga tui luan kawr zawng zawngte mumal taka kawrpuia luan luh tuir vek tum niin, SASCI hnuaiah cheng vaibelchhe 61.76 hmangin hmun 26 ah tui luan kawr siam hna thawh mek a ni a, cheng vaibelchhe 35 dang dilna tur DPR buatsaih mek a ni bawk.

Pu V. Lalruatliana, Dy.CEO, Aizawl Smart City Ltd. pawhin ‘Solid Waste Management Rules, 2026’ chungchang presentation hmangin a hrilhfiah a. He dan thar hian Solid Waste Management Rules 2016 chu thlakin, April 1, 2026 atang khan hman tan a ni tawh a ni. He dan thar hian khawpui chhunga bawlhhlawh siam chhuah leh vawmkhawm danahte, a thliar hran (segregation) leh a sawngbawl danahte ruahmanna thar chipchiar takin a rawn siam a. ‘Solid Waste Management Rules, 2026’ hnuaiah hian bawlhhlawhte chu chi li (four categories) ah thliar hran tur a ni a, chungte chu :1) Dry Waste (bawlhhlawh ro) - Plastic, lehkha, thir leh a hman nawn theih thildangte, 2) Wet Waste (bawlhhlawh hnawng) - Chaw eibang leh thlai hnah/kawr (biodegradable), 3) Domestic Hazardous Waste - Hriau, damdawi bur leh battery ang chite 4) Sanitary Waste- Diapers leh sanitary napkins angte a huam a ni. He dan thar hnuaiah hian bawlhhlawh a paihna hmuna paihlote hremna na tak a awm a, sorkar official he dan bawhchhiate hrem tura ruat te pawhin hremna an lekkawh loh chuan anmahni official zawkte pawh hrem an ni dawn a ni.

Mission Urban Drain tlangzarhna inkhawm hi Pu K. Lalthawmmawia, Commissioner & Secretary, UD&PA in a kaihruai a, Pu Vanlalhlana, PWD Minister, Pu Lalthansanga, EF&CC Minister, Dr. Vanlalthlana, ICT Minister, Pu B. Lalchhanzova, IPRP&S Minister, Pu Lalnghinglova Hmar, Tourism Minister, Pu Lalchhuanthanga, Aizawl South-II MLA, Pi Baryl Vanneihsangi, Aizawl South-III MLA, Aizawl Mayor Pu H. Lalremtluanga, Deputy Mayor Pi R. Lalawmpuii, AMC Executive Corporator-te leh AMC Corporator te bakah AMC Commissioner, PHED E-in-C, Aizawl City Local Council Association hruaitute, Media aiawhte, AMC leh UD&PA official-te an tel a, Mission Urban Drain leh Solid Waste Management Rules, 2026 kaltlanga hmalak dan turte zau takin an sawiho nghal a ni.