Mizoram hmun hrang hrangah Mizo Hmeichhe Insuihkhawm Pawl - MHIP Day vawi 43na hman anih rualin Mission Veng Branch chuan vawiin khan Col. Z S Zuala, Parliamentary Secretary  hovin Synod Conference Centre, Mission Vengah hlawhtling takin an hmang.

Khawvel inrelbawl chhoh kawngah hian  Mipa te hi chungnung zawk leh awmkhauh zawka ngaih an nih laiin Hmeichhia te erawh chu hnuaihnung deuh zawk leh awmnem, dimdawi ngai deuhva ngaih an ni. Politics ah te phei chuan  Hmeichhe thlan hi hreh deuhna te  a awm emaw tih tur  a ni a. Mahse  tunlai khawvelah chuan hei hi a ni tawh lovin kawng engkim ah intluktlanna kalpui a ni chho tawh a, India ram mai bakah Mizoram ngei pawh hi Hmeichhiate hmasawnna kawngah rahbi duhawm tak tak a chher chho mek ani tiin  khuallian  Pu ZS Zuala chuan Mizoram Sorkar phei hi chuan Hmeichhiate chawikan na lam ah hma ala nasa in  Hmeichhia te hi a duat a. Thenawm State thenkhatin an dodal laiin  Mizoram ramah chuan  30% lai   AMC leh Local Council ah seat a ruatsak  a, chuvang chuan  tunah  hian ram rorel  leh inrelbawl kawngah hmeichhia te pawhin mawhphurhna  sang tak tak an vuan tawh a ni a ti.

Hmeichhia te hian thinlung leh tihtak zeta hma an lak chuan kawng tam takah  hmasawnna a awm tih a lang fo, mipa thenkhat ai pawha ngaihtuahna  tha leh hmangchang an hriatna pawh a awm. Kohhran leh Sorkar pawh hian a dimdawiin chawikan a tum hle a, chu chu a taka  hmasawnna hmuh theih in  tunah chuan a awm ta tiin  Parliamentary Secretary  chuan lawmawm a tih thu a sawi a. Chutih laiin Hmeichhia te chu hmalakna kawng hrang hrang ah ke pen fimkhur a ngaih thu leh nghawng thalo zawk  thlen thei kawngah te chet la lovin, hleihluak taka tawngkam hman leh chet thawh lo turin a chah nghal bawk a ni.

Kawng hrang hranga chhuanawm Vengchhung Hmeichhia te hnena chawimawina  thilpek leh  zaipawl intihsiak  lawmman  te chu khuallian hian a sem nghal a ni.

MHIP Mission Veng Branch in vawiin a Day an hman programme kaihruaitu President Pi Lalnipui chuan MHIP chu hmeichhia rahbi tleu leh dinhmun harsa zawk te chhawmdawltu leh tanpuitu pawl lian tak, member te pawh Pathian leh kohhran bel tlat mite awmkhawmna anih avangin ram tan, khawtlang tan leh mimal tan pawha an hnathawh hlawhtling tak tak hriat tur leh hmuh theih a thahnem tak a awm tawh thu sawiin Hmeichhia te a tha lam hawia inpumkhatna, ke chheh rualna pawl ropui tak a nih thu a sawi a. Vawiin ah kum lama upa tawh leh la valai zawk te beisei phak aia thahnem member te Mission venga MHIP Day hmang ho tura an lo kalkhawm chu lawmawm a tih thu a sawi bawk a ni.

MHIP Member chatuan ram pan ta te pualin sunna hun vawiin  hian hman a ni a. Mission Veng MHIP Branch te hi group hrang hrang ah inthen in Pu Rokunga phuah Kan Zotlang Ram Nuam hla hmangin in el a nih bakah infiamna hrang hrang a group tin te in intihsiak a ni a, hengah ah hian lawman tha tak tak te siam a niin he programe hmangtu te zawng zawng te hnenah Ei leh In tui tak leh lawman hlu tak sem an ni vek bawk a ni.