2812/2022-2023

Aizawl 26th November 2022: Nimin chawhnu khan Mission Vengthlang Govt. Primary School Diamond Jubilee lawmna hun chu a sikul tualah hman a ni a. HRD Board Vice Chairman Dr. L.Thangmawia’n khuallian niin Jubilee lungphun a kheh hawng a, “Mahni hnam tawng dah pawimawh leh thiam chunga English leh hnamdang tawng kan zir nasat a ngai a ni" a ti. Aizawl West-II bialtu MLA Pu V.L.Zaithanzama chu khual zahawm niin tlaiah ruaitheh a ni bawk.

Dr. Thangmawia chuan Govt. Primary School, Mission Vengthlangin kum 60 a lo tling ta chu thinlung taka a lawmpui thu a sawi a. Mizo ten zirna kan ngaih pawimawh avangin khawtinin sikul neih tumin theihtawp kan chhuah thin a. UT kan nih lai atang khan Sawrkar ruahmanna nghak lova khaw tam takin vantlang tangruala sikul an din a tam hle a, chung chu loh theih lohin sawrkarin a bawhzui thin a ni. Mahni hnam tawng, Mizo tawng ngaihhlut kan zir a ngai a, mahni tawng hmang dik lo te kan innuihzat a hun tawh a, mahni hnam tawng ni lo, English hmang dik lo te kan nuihzat thin hi sim a hun tawh zawk a ni tiin sap ho ngei pawhin an tawng kan hman dik tawk loh tumin kan pianpui tawng a nih loh avangin min hrethiam em em thin zawk a ni a ti.  Mizo thalaite thluak hi a tha a ni tih sawiin hnamdangte zir ang tluka kan zir peih a nih ngat chuan khawvela lang tham turin Mizo zirlaite kan tha tawk a ni a ti a, mahni line-a mithiam bik, khawvelin mithiam a mamawh changa a lamchhuah tlak mithiam tam zawk kan awm theihnana tan kan lak a tul tawh hle a ni a ti.

Khual zahawm Pu V.L.Zaithanzama MLA pawhin Diamond Jubilee thleng thei a Govt Primary School, Mission Vengthlang a awm chu a lawmpui tak zet tih a sawi a. Sikul building tha in nu leh pa leh zirlaite rilru a kaihruai nasa thei hle a, sikul building tlabal te thuam that zel hi a pawimawh hle a ni a ti a. Kohhran sikul sawrkarin a lak hian a zirtirtu leh a building ngai tho ah a hma aiin a tha lo thin hian ngaihtuahna a ti thui hle a ni a ti bawk.

Govt. Middle School, Mission Vengthlang hi kum 1962-a din a ni a.Tun dinhmunah thawktu 5 awm mekin he sikul hian MCS, MFAS, Doctor, Engineer, kohhran Upa, Pastor leh khawtlang hruaitu tha tak tak engemaw zat a lo chher chhuak tawh a ni.

He hunah hian he sikula zirtirtu lo thawk tawh te, he sikula zirchhuak mi hlawhtling tak tak te leh Mission Vengthlang huamchhunga tlawmngai pawl hruaitute leh sawmbik mi thahnem tak an tel a ni. Inkhawm hi Pu Zobela, Headmaster-in kaihhruaiin he sikul chhuak Rev. Dr. Malsawmzolian’n hunserh a hmang a, Organising Secretary Pi Lalhlupui’n report pe in Upa Lalnunfela’n lawmthu a sawi zawhin tawngtaina hmanga hun hi tihtawp a ni.