Vawiin chawhma dar 10.30 khan Mizoram Secondary Teachers' Association chuan kum khata khawmpui an neih thin vawi 12-na chu Chanmari YMA Hall-ah an nei a; School Education Minister Pu Lalsawta chu khuallian a ni a, Pi Esther Lalruatkimi, Secretary & Director, School Education, Govt. of Mizoram chu khual-zahawm a ni.
Pu Lalsawta chuan, "Zirtirtu kan nih chuan kan ngaih pawimawh ber chu zirlaite an ni tur a ni a; kan dinhmun sawhnghetin, kan chanvo leh hamthatna siam tha mah ila zirlaiten kan thawhrah seng tur an neih si loh chuan a sawt loving" a ti. Zirna siam that lehzuana atana Mizoram sawrkarin kalphung thar a siam thenkhat - Comprehensive & Continous Education (CCE) leh Middle School-a Class VIII behtir a nih tak chungchang sawifiahin Education Minister chuan, "Zirna hi India ram chhung leh pawn lam thlenga Mizote pholeng tha ber tur a nih avangin a bul tantu awm a ngai a; chuvang chuan kan inpeih hun tur nghah ngawt ngawt ai chuan inpeih tawk lo deuh hlek chung pawha hmathar zuan a ngai a ni" a ti. Mizoram sawrkar hnuaia High School-te chu result that leh that loh kawngah chauh ni lovin, mihring puitling engzatnge an chherhhuah tih lama teh a tul thu sawiin, "Mizoram sawrkar hnuaia High School tam tak hi chhuanawm leh chhenfakawm an awm a ni" Pu Lalsawta chuan a ti bawk. Education Minister chuan Department inrelbawlna chungchanga vuivaina leh innghirnghonate chu rilru thianghlim tak pu chung a bansan a hun thu sawiin, kalphung diklote chu a dik zawka thlakthleng chhoh mek a nih thu leh mawhphurtu hmasate mawhpuh leh chirhtheh zui an tum loh thu a sawi lang bawk.
Pi Esther Lalruatkimi chuan, "Mizoram sawrkarin Education Reforms Committee a din hi zirna lama kan tlakchhiat vang ni lovin, a aia tha zawka kalpui dan tur ruahmanna a ni zawk a ni" a ti a. Education Department hnuaia hnathawktute chu mahni insit lo tur leh sawiselna avanga rilru tihnual lo tura fuihin, "Kan tlin lohna lai miten an tlangaupui karah hian kan tih thatte hi kan tlangaupui ngawrh ve a tul a ni" Pi Esther Lalruatkimi chuan a ti.
Vawiina MISSTA General Conference vawi 12-na hi Pu Lalchhandama Tochhawng, Vice President chuan a kaihruai a; Pu Lalrammawia, President chuan thuchah a sawi bawk. Inkhawmpui hun then-hnihnaah palaiten agenda 5 an ngaihtuah ho a. Heng zingah hian - headmaster awm lohna thla thum chhunga dah khah te, high school zirtirtute zinga selection grade kai chin gazetted officer-a hlankaite a tel.
