4988/2025-2026

Aizawl the 24th March 2026: Vawiin khan Mizo Diaspora Cell, Chief Minister Office chuan Mizoram pawna Mizo Welfare leh Association hrang hrangte nena inkawmna (online meeting) an buatsaih a. Mizo Diaspora Cell hnathawh dan leh Mizo DiasporaHub hman tangkai dan tur te an sawiho.

Pu Vanlaldina Fanai, Chairman, Mizo Diaspora Cell (MDC), Commissioner & Secretary to CM hovin MDC member-te hi CM Conference Hall-ah an thu a, India ram chhung leh ram pawna awmten online-in an lo zawm a ni.

Pu Vanlaldina Fanai chuan meeting zawmtute hnenah lawmthu a sawi a. Welfare leh Association hruaitute chu Mizo DiasporaHub-a inziaklut tura sawmin, sorkar chuan in tana awlsamna tam tak a thlensak beiseiin he Application hi a siam a. Lo in-register theuh turin kan duh che u a, hmang ngei turin tumah kan phut lui lo thung. A hmangtuten in tangkaipui lehzual theih nan a tul anga siam that zel pawh kan inhuam a ni, a ti.

Mizo Diaspora Cell din chhan chu khawvel hmun hrang hranga awm Mizote inhuikhawm a, a tul huna intanpui a ni a. Harsatna tawk, a bik takin ram pawn lama awm mi eng emaw zat kan lo tanpui tawh a, kan tanpui mek bawk a. A tul apiang kan tanpui zel bawk ang a. Mizoram pawna chenghote hlim leh thlamuang taka awm turin kan duh che u a ni, a ti.

DiasporaHub chungchanga hriat duh an neih hrang hrangte hrilhfiah an nih bakah tangkai zawka hman theih dan tur rawtna an neih te an sawi bawk.