Chief Minister Pu Lal Thanhawla chuan Zonet Mizo Idol, Lalthuthaa hmuahna Programme, District Playground-a nimin tlailam dar 1:30 pm vel a neih chu hmanpuiin, thu sawina hun a hmang.

Lalthuthaa hmuahna programme a mipui kalkhawm te hi Saiha khawpui chhunga mipui pungkhawm tam ber tum ni a hriat a ni. Lalthuthaa Hmuahna programme-ah thusawiin, Chief Minister Pu Lal Thanhawla chuan rimawi khawvel hi a lo tuipui ve viau thin a, Mizorama Pop Group hmasa ber The Beginners te pawh a lo enkawl ve tawh thin thu a sawi chhuak, music collection pawh Mizoramah nei tha pawl tak a ni a rinthu a sawi tel bawk. Pu Lal Thanhawla chuan Cable operator ten thalaite talent haichhuak tura programme tha tak tak an duang chhuak thin chu lawmawm a tih thu sawiin, mipui rawng an bawlna kawngah tha lehzuala hna an thawh theih nan duhsakna a hlan a. Lalthuthaa pawh MIZO IDOL a nih ang ngei a, zaia chauh nilo, nungchang a pawh, thalaite tan a entawntlak a, a pawnlam leh a chhunglam nun thianghlim taka vawng tlat turin a chah a. Hma lama a kal zelna turah pawh hmingthanna leh larna te phurzo a, Idol dinhmuna hlangkaitu Pathian hre reng chunga ke pen thin turin duhsakna a hlan a ni.

Pu S.Khipo,Chief Executive Member, MADC pawhin thusawina hun hmangin, Lalthuthaa malsawmna dawn hi kum hnih- khat kalta a Mara ram thalaiten malsawmna hrang hrang an dawn kaltluang zel chhunzawmna a ni, a ti a. MADC in Lalthuthaa Idol anih lawmpui nan sorkar hna an pek pawh a puangchhuak nghal a ni.

Lalthuthaa hmuahna-ah hian Chief Minister Pu Lal Thanhawla leh nupui Pi Lal Riliani bakah, Aizawl atanga CM tawiawmtu Pute: H.Zothangliana, Parliamentary Secretary , R.Lalrinawma, Chairman ,Law Commission, TT.Zothansanga te an tel a, Pi Lal Riliani pawhin Lalthuthaa hi thilpek a hlan ve a ni.