Zoram Research Foundation leh Aizawl Theological College tangkawpin an buatsaih Seminar on Studies in Mizo Religious Mindset: Conversation and Born Again Phenomenon tih chu vawiin khan Sandy’s Hall, Aizawl Theological College, Durtlang, Aizawl ah neih a ni a. He hunah hian hmun hrang hrang atanga mi thiam leh mi pawimawh sawm bik kal khawmte leh Aizawl Theological College Zirtirtute leh Zirlaite, an vaiin mi 150 velin hun hlawkthlak tak an hmang.
He Seminar hi hun thumah then a ni a. Session khatna hi Prof. Thangchungnunga, Chairman, Zoram Research Foundation-in a kaihruai a. Rev. Vanlalzuata, Sr. Executive Secretary, Mizoram Synod-in hunserh a hman zawhah Upa Prof. R. Lalthantluanga, Vice Chancellor, Mizoram University hnen atangin Keynote Address ngaihthlak a ni.
Session hnihna ah Prof. O Rosanga, Head of Department, Dept. of History & Ethnography, Mizoram University chuan session a kaihruai a. Thupui pawimawh tak, “Mizote a hnam pumpuia Kristiana kan inleh dan bihchianna” (Rethinking Mass Conversion, Factors and Causes) tih chu Rev. R. Lalthanmawia, Former Moderator, Mizoram Synod leh Dr. Sangkima, President, Mizo History Association ten an sawi a. Thupui ngaihthlak zawhah sawi hona hun tha tak neih zui a ni.
Session 3-na chu Rev. Prof. C. Lalhlira, Vice-Principal, Aizawl Theological College-in a kaihruai a. Thupui pawimawh tak, “Mizoten Pian tharna kan hriat danin kan hnam nun a nghawng dan” (The concept of Pian tharna in Mizo Christian Life and its repurcussion in our society) tih chu Rev. Rosiamliana Tochhawng, Assistant Professor, Aizawl Theological College leh Rev. R. Zolawma, Assistant Prof., Academy of Integrated Christian Studies ten zir chianna felfai tak nen an present a. Sawi hona hlawkthlak takin a zui nghal.
Thupui ngaithlak leh sawi hona a zawh hnuah Rochamliana, General Secretary, Zoram Research Foundation-in Vote of Thanks a sawi a, Seminar hman zawh a ni.
