Vawiin khan Pachhunga University College, Department of Mizo leh Central YMA tangkawpin a buatsaih, ni hnih chhung awh tur Mizo tawng chungchang zirzauna leh tihmasawn dan tur ‘National Seminar on Mizo Language : Contemporary Challenges and Prospect’ chu Central YMA Hall, Tuikhuahtlangah Parliamentary Secretary, Pu Lal Thanzara chuan a hawng.
Khuallian Pu Lal Thanzara chuan hnam fing leh changkang apiangin anmahni tawng an ngaih pawimawh thu a sawi a, “Khawvel ram hrang hranga hruaitu lian te pawh an inhmuhkhawm nikhuain, mahni tawng ngeiin thu an sawi ngat zel thin. Mahni tawng thiam leh hriatchian kan inzirtir thar a ngai zual hle a ni,” a ti. Mizo tawng (Duhlian tawng) chu Mizorama cheng hnam hrang hrangte min suihkhawmtu, min ti zahawmtu a ni a, hmasawnna kawngah pawh nasa taka min puitu a nih thu a sawi bawk. Mizo tawng hmanga lehkha ziak uar tur leh hmang nasa turin kalkhawmte a chah bawk.
Pu Lal Thanzara hian Dr. Zoramdinthara lehkhabu ziak “Mizo Fiction - Emergence and Development” chu a tlangzarh bawk.
He seminar hawnna inkhawm hi Central YMA Vice President, Pu Lalbiakzuala chuan a kaihruai a. Seminar Coordinator, Dr.Zoramdinthara chuan inlawmna thu sawiin, Pachhunga University College Principal, Dr. Tawnenga leh he seminar sponsor-tu, Central Institute of Indian Languages (CIIL), Ministry of Human Resources Development aiawh, khualzahawm, Prof. Kedutso Kapfo te chuan thu an sawi bawk.
Keynote Address petu, Controller of Examination, Mizoram University, Prof. R.L. Thanmawia chuan tawng chu inbiakpawhna mai bakah hnam nihna (identity) pawimawh tak leh hnam ziarang (culture) siamtu a nih angin, Mizo tawng pawh humhalha tihhmasawn a tul thu a sawi bawk.
He seminar-ah hian Aizawl khawpui chhung YMA branch hrang hrang aiawh te leh college zirtirtute an tel a, mithiam tak tak te paper ziak chu an zirho a ni.
Pachhunga University College, Mizo Department hian National level leh State level-ah seminar an buatsaih fo thin bakah zirlaite tan kumtin study tour an buatsaih ziah a. Nikum khan Khawbunga Mizo Hla Kungpui Mualah seminar buatsaihin, kuminah National seminar an buatsaih leh a, lehkhabu rotling tak an chhuah ziah bawk. Pachhunga University College hi Mizorama college lian ber niin zirlai 1947 an awm mek a, Mizo Department-ah hian zirlai (core students) 82 leh faculty 7 an awm mek bawk a ni.
