Sorkar laipuia Ministry of Labour & Employment hmalakna pakhat, Skill Development Initiative (SDI) Scheme kalpuina hnuaiah, vawiin khan Mizo nula 50 rual chu Kolkata-a Emporium Training & Consultancy (ET&C) Pvt. Ltd a training turin T. Sangkunga, Mizoram Youth Commission Chairman chuan a vailiam. Training tura tirhchhuahte hi Mizoram Youth Commission leh Labour, Employment & Industrial Training Department tangkawp hmalaknaa Skill Fest 2014 neih zawh tak atanga thlan chhuah an ni a. Training turte hi vawiin chawhnu khan Horticulture Conference Hall-ah LE&IT Director Pu Rotluanga hovin thlahna hun hmanpui an ni tawh bawk.
Pu T. Sangkunga chuan training turte chu taima tak leh hrehawm tuar huam a zir tur an nih thu sawiin, theihtawp an chhuah phawt chuan hna tha an hmuh ngei ngei tur thu a sawi a. Anmahni mai bakah an hnung ami batch dangte hmabak chu training laia an zir taimak leh an nun uluk danah ah a innghat thui hle a ni, tiin a fuih bawk.
Training hi thla li (4) awh tur niin, Mizoram Youth Commission chuan June thla chhung vek hian training turin mipa 40 tirhchhuah leh theih an beisei bawk.
Zirlaite hi an kal man cheng sang nga (Rs. 5000) thleng tum sak vek an ni ang a, training chhung hian thlen man (boarding and lodging fee) nitin cheng 300 pek an ni dawn bawk. Emporium Training & Consultancy (ET&C) Pvt. Ltd-a Operations Manager Pu Anirban Mukherjee pawhin zirlaite an him tur thu a tarlang a ni.
