Vawiin khan MSU General Headquarters in Mizoram University Graduate Result, 2010 a subject hrang hranga Mizo topper te chawimawina Vanapa Hall a an buatsaih chu Education Minister Pu Lalsawta'n khuallian niin a hmanpui.

Pu Lalsawta chuan Mizote kulhpui leh  hmanraw pawimawh ber chu zirna a nih thu leh dingchhuak turin theihna kan nei a ni tih kan pawm a tul thu a sawi a. Sorkar laipui leh Mizoram sorkar pawhin theihtawp chhuah a zirna tihmasawn tura nasa taka a beihna chu mipui ten thlawp a tihdan phung pangngai kalsan a tul a ni a ti a. Chawimawi phu te chawimawi tur leh zirna chawisang tura thahnem an ngaihnaah MSU te chu fakin an dinchhan laimu, an tum ber hrereng fo turin a chah a.Thahnemngaihna kawnga inhmachhawn a awm ai chuan dawhkan kil a inbiak tawn hi sorkar duhdan a ni a ti.

Minister chuan zirna tha zawk beisei avanga phai lama Mizo tam tak hnamdangte zirtur tura an liam thlak laia  Mizoram chhung ngei a kan zirna University leh zirna in hrang hrangte hmasawnna tur a mithiamte pawn lam atanga kan seng luh hi a pawimawh a ni a ti a. Chutihrual chuan Mizo mithiam, mi tling leh thate hnawl emaw neksawr emaw chu a thiang lo a ni a ti.

Kumina MZU graduate examah hian Honours subject hrang hrang sawmlehpahnih-Mizo, Philosophy, Political Science, Public Administration, Education, Geography, Maths, Geology, Botany, Physics, Zoology leh BCom(H) ah te Mizo zirlai ten pakhatna an hauh fai vek a ni.