Mizoram Youth Commission hmalaknaa Mizo zirlaite tana Degree Course leh Master Degree Course zir nana an zir man, admission fees, exam fees,  hostel fees,  study tour senso leh thesis chhutna man zawng zawngte central sorkar-a Ministry of Tribal Affairs-in a tumsakna tur ruahmanna hawnna chu vawiin chawhnu dar 1:30 khan Chanmari YMA Hall ah neih a ni a, Chief Minister Pu Lal Thanhawla'n a hmanpui.

Zirlai kalkhawmte hmaa thu sawiin Chief Minister chuan sorkarin thalaite hmakhua ngaihtuah a ngaihpawimawh thu leh thalai te tana hmalak dan hrang hrangte a tarlang a, Mizoram Youth Commission pawh chumi lama hma la tura din a nih thu a sawifiah bawk. NIT, Management, Mass Communications, Fashion Technology zirna leh Medical College leh Sainik School te nei tura sorkarin hma a lak mek thu sawiin thalaite tan hna tam tak hawn turah zirlaite chu tun atanga lo inbuatsaih lawk turin a chah bawk. Zoram khawtlang nun chhe mek siamtha tura bei tu tur chu thalaite an ni tiin taihmakna, thawhrimna, rinawmna leh tumruhna nen theihtawp chhuaha tan la turin a sawm bawk. Thawhrimna leh mahni invawnna tel lo chuan hlawhtlinna a awm thei lo tiin thalai te chu rim taka thawk thin turin a fuih a, mahni hna theuhvah Kristian nihna lantir zel turin a chah bawk. Sorkar chuan quality education a ngaihpawimawh thu sawiin zirlaite chu chhawrtlak leh  thiamna tak tak pawchhuak tura inbuatsaih turin a fuih a, phai lama lehkha zir thei lo tana remchang (opportunity) siamsak tura sorkar hmalakna te chhawr tangkai tum theuh turin a chah bawk a ni. Hetianga thalaite tana hmalakna ah Chief Minister chuan fimkhur taka kalpui tul a tih thu sawi lang bawk.

Labour & Employment Minister Pu Lalrinliana Sailo chuan zirlaite fuihna thu sawiin khawvel company lian te Mizoram-ah an la rawn luh zel dawn avanga mithiam tam tak an la mamawh tur atan lo inpuahchah turin a sawm a, an thil zir reng reng ah theihtawp chhuaha thinlung taka bei thin turin a chah bawk.

Students Sponsorship hawnna programme hi Youth Commission Chairman Pu Hmingdailova Khiangte-in a kaihruai a, Parliamentary Secretary Pu S.Laldingliana, Planning Board Member Secretary Pu P.L.Thanga, Education Secretary Pi Esther Lalruatkimi ten an hmanpui a, Dr Gulshan Sharma chuan thalai / zirlaite hnena thiamna pe tura Institute of Technology & Future Trends (ITFT), Chandigarh hnathawh dan hmang te power point presentation hmangin  a sawifiah bawk.

He zirlaite zirna senso tumsakna ruahmanna chhungah hian Degree Course zir duh tan seat 150 leh Master Degree Course zir duh tan seat 40 siam a ni a, vawiin tlai atanga tanin ni 21 August, 2010 thleng hian interview leh admission te neih a ni ang.