No.2851/2020-2020

Vawiin khan Cooperation Minister Pu C. Lalrinsanga kaihhruaina hnuaiah M/s MIZOFED Ltd. chuan Delhi lamah Mizoram tharchhuah Dragon Fruit sample a thawn chhuak tan.

Hemi chungchangah hian Cooperation changtu Minister Pu C. Lalrinsanga, chuan, Horticulture Department leh Cooperation Department hnuaiah kan State Level Society thangduang tak MIZOFED Ltd. te hi kan thawhhona a tha in hmasawnna hrang hrang kan hmu zel a. Tun COVID-19 hrileng kara harsatna hrang hrangin min tlakbuak chung pawh a Dragon Fruit sample kan han thawnchhuak thei hian market zau zawkah min dahchhuah tir dawn a. Hetianga hma kan sawn zel chuan kan economic perspective pawh subsistence level chauh ni lovin market economy lam kawng kan zawh chho thei dawn tihna a ni. SEDP-in a tum, market thleng phak ruahmanna kalpui zel hi kan duh ber leh kan mamawh ber a ni a. He kawng zawha kan State Level Cooperative Society chhuanawm tak MIZOFED Ltd hruaitute leh thawktute inpekna a a fakawm hle a ni, a ti a. Mizote hian tanrual hi kan thiam zawng tak a ni a, cooperative movement hi kan thil zei sa a ni bawk a; tuna kan mamawh chu hmalam pana kal mai hi a ni a. Tanrual kan thiam a, thapui kan thawh phawt chuan Pathian hian a malsawmna hi hla taka a dah lo tih pawh kan hmu zel ang, a ti.

Tun dinhmunah Dragon Fruit tharchhuah lamah Mizoram hi India ramah hmaruaitu a ni mek a. COVID-19 avanga ramdang atanga lakluh tihtlem a nih chhoh takah chuan Mizoram tharchhuah hian demand a ngah chho hle tura ngaih a ni.

Vawiina Dragon Fruit sample thawnchhuah hi Thingsul Tlangnuam loneitute tharchhuah a ni a. Dragon Fruit hi Local Market ah zawrh a ni tlangpui thin. MIZOFED hian market zau zawk dapin tunah hian Mizoram pawna Dragon fruit te hi hralhchhuah turin Delhi lama M/s Crofarm, Gurgaon hnenah a thawn a. Ruahmanna ang chuan Dragon fruit hi regular zawka hunbi neia thawnchhuah chhunzawm zel a ni ang.