822/2024-2025

Aizawl the 14th June, 2024 : Vawiin khan Mizoram Science, Technology & Innovation Council (MISTIC) buatsaihin 'Mapping out priority areas for the development of Biotechnology in Mizoram' tih thupuia neiin, Biotechnology hmanga Mizoram hmasawnna tur hrang hrang sawiho a ni. He hunah hian Mizoram sawrkar Department hrang hrang : Agriculture, Horticulture, Animal Husbandry and Veterinary, Fisheries, Sericulture, Environment Forest & Climate Change, National Health Mission, State Medicinal Plants Board Ayush, Krishi Vigyan Kendra Aizawl leh Mamit atangte leh zirna in: Department of Biotechnology Pachhunga University, Department of Horticulture Aromatic and Medicinal Plants Mizoram University, College of Veterinary Science & Animal Husbandry, Zoram Medical College, ICFRE-Bamboo and Rattan Centre atangte in mithiam mi engemaw zat an kal khawm a ni.

He hun hi Er H Lalsawmliana, Chief Scientic Officer & Member Secretary, MISTIC chuan kal khawmte lawmna thu a sawi a, Mizoram tana Biotechnology pawimawhzia leh hmasawnna atana a tangkai theih dan tur a sawi. Pu Samuel Lalmalsawma, Principal Scientific Officer, MISTIC chuan kaihruaiin meeting sawihawnna a nei a. Dr. Lalchhandami Tochhawng, Scientific Officer, MISTIC chuan Mizoram tana Biotechnology lama Science & Technology-te hmalakna hrang hrang tarlangin tun aia nasaa hmalak a ngaihzia thu a sawi bawk.

He hunah hian Mizorama ram leilung hausakna (bioresource) lama harsatna hrang hrang neihte sawiho niin Mizoram tualto thlai chi hrang hrang te, ramhmul damdawi te, sa leh sangha te humhalh leh tangkai zawka hman a nih theih dan turte sawiho a ni. Ramhnuai (forest) humhalh a nih theih dan tur te sawi ho a ni bawk. Thlai chi tha zawk siamchhuahna atana tissue culture laboratory changtlung zawk te, pa chi (mushroom spawn) tha zawk leh tam zawka siamchhuah te leh thlai chi lama intodelhna kawnga chak zawka hma lak a nih theih dan turte sawi ho a ni a. Hri inkaichhawn awlsam (infectious disease) leh inkaichhawn theih loh (non-infectious disease) natna tam tak laka kan him theihna tur leh sik leh sa inthlak danglam (climate change) avanga natna awm thei zirchian leh a do kawnga hmalak dan tur te pawh sawiho a ni a. Heng bakah hian Mizorama Science & Technology kaihhnawih department hrang hrangte inkarah thawhhona tha zawk awm theih dan turte sawiho a ni bawk.