Mizoram Remote Sensing Application Centre (MIRSAC)-in Mizorama lirnghing leh thlipui leh cyclone nat theihdan an zirchianna report bu - Atlas pahnih chu vawiin khan Parliamentary Secretary Pu K.S.Thanga’n a office chamber-ah a tlangzarh.

Pu K.S.Thanga chuan Mizoram hi lirnghing na tak tuar thei mai dinhmuna ding kan ni a, thlipui pawh kum tin deuh thawin kan tuar thin a, in leh lo leh huan thlai pawh kum tin deuh thawin kan chan fo bawk a. Tunah hi chuan hetiang chhiatrup theihna lo thleng mai thei te hi scientific taka zir a tul tawh a, Disaster Management hi sorkar pawhin a ngai pawimawh em em a. Chuti ang atana lo inrinlawk dan kan hriat theih nan leh kan dinhmun kan hriatchian lehzual theih nana MIRSAC-in heng Atlas an buatsaih ta hi a lawmawm hle a ni, a ti.

Atlas report hi Pu F.Lalramchhuana leh Pu Z.D.Laltanpuia, MIRSAC Scientist ten an pe a. Lirnghing chungchang bikah hian India rampum ngaihtuahin Seismic Zone V kan ni naa, tun tumah hian Probabilistic Method hmanga an zirchiannaah chuan Seismic Zone V-ah Mizoram chhung 12705.69 sq.km. (60.25%) awmin, 8381.31 sq.km. (39.75%) chu Zone IV-a a awm nia hmuh a ni. A tlangpuiin Mizoram hmar lam hi chhim lam aiin a hlauhawm zawka ngaih a ni.

Thlipui (Wind & Cyclone) tleh thin dan leh a nat theih danah Building Material & Technology Promotion Council (BMTPC)-in India rampum ngaihtuaha an then danah chuan Zone sang ber ‘Very High Damage Risk Zone - A’ ah Mizoram pumpui hi a awm a; amaherawh chu Mizoram chhungah pawh hian a hlauhawm dan leh nat theih dan a in ang vek lo a. MIRSAC-in a zirchianna ah chuan Mizoram hi Zone 3-ah then leh a ni a - Very High Zone ah 3737.49 (17.68%), High Zone ah 7285.57 (34.50%) leh Moderate Zone ah 10064.03 (47.82%) te a thendarh leh a ni a, Mizoram chhimlamah Very High Zone hi a tam zawk.

Atlas tlangzarh inkhawm kaihruaitu Dr. R.K.Lallianthanga, Project Director, MIRSAC chuan he project hi NEC bultum a nih thu leh Disaster Management System project pumpui hi nakum March thlaah zawh a beisei awm thu a sawi a, hetiang chhiatrupna lo thleng mai thei - Lirnghing leh Thlipui chungchanga Mizoram dinhmun chiang leh zuala hriatna atan hian Remote Sensing leh GIS thiamna hman a ni a, data hrang hrang rawn a nih bakah WADIA Institute of Himalayan Geology, Dehradun-a Scientist te pawh rawn an nih thu leh Training te pawh an neih thu a sawi. Atlas te hi a hmang tangkai tur department-te hnenah a thlawnin pek a ni.

He tlangzarhna inkhawmah hian Dr. Vanlalzara, Principal Scientific Officer, Directorate of Science and Technology te, Disaster Management & Rehabilitation Department aiawhten thu an sawi bawk a. Department hrang hrang aiawh teleh MIRSAC Scientists engemawzat an tel a ni.