Mizoram sorkar Sports & Youth Services Department buatsaih ‘Mizoram Adventure Festival’ chu Vaipuanpho ah March ni 20 leh 24 chhung khan hlawhtling taka zawhfel a ni.

Adventure Club 21 atanga mi 127 te chu thuang 2 ah inthen in, a thawh khatna (1st Phase) ah hian Lunglei leh Saiha District, Hnahthial , Kulikawn , Govt.Aizawl North College, Kulikawn Middle School leh Bungkawn Veng atanga Youth Adventure Club te bakah 6 O’Clock Youth Adventure Club atang te in mi 62 an tel a. A thawh hnihna (2nd Phase) ah chuan Ch. Chhunga High School, Zotlang Middle School, R.S. School Of Learning , Durtlang North, Kawnpui, Tlangnuam, Bawngkawn leh Govt. Aizawl College atangin Youth Adventure Club member 65 an tel a ni.

Tun tuma Mizoram Adventure Festival neih hi Vaipuanpho leh Reiek Tlang, Reiek Kham ah te leh Ailawng ramah te neih a ni a. Heta tel te hian hruizen hmanga hmun chhengchhe tak tak lawnchhuah te, kham lawn te, ke a ramhnuai pilril tak tak fan te, pukluhchhuah leh rampalailenga salawnga dam khawchhuah dan te bakah Adventure Sports lama hautak tak Rapelling, Jummaring, Commando Bridge leh Tyrolean Traverse te an zir a ni.

Zan lam ah Adventure programme kalphung, thil tum leh tangkaina, Sports Department in Adventure a kal pui dan leh hmalakna kal mek te inhrilh hriatna leh in zirtirna nei in Camp Fire hlimawm tak an hmang thin bawk.

Tunlai hian Adventure lamah chanchin lawmawm tak tak Mizoram in a nei mek zel a. May leh June thla-a 1st North East Everest Expedition (khawvela tlang sang ber Mt. Everest lawn tur) zingah Silver Hawk Youth Adventure Club zing ami David Zohmangaiha chu thlan a ni a. Directorate of Sports & Youth Services chuan a tel theihna tura sum leh pai leh tul dang te a ngaihtuahsak a ni. Official, amah tawiawm tu tur pawh Qualified Staff, Pu Vanlalliana, State Adventure Organiser a pe bawk a, ani hian Expedition neih chhungin technical guidance leh support a pe ang.

Tarlan tawh angin Mizoram Adventure Festival a tel te hi March ni 20 khan Directorate of Sports & Youth Services kawt, Khatla kawn-ah Sports Minister Pu Zodintluanga, chuan a vailiam a, Sports & Youth Services Department Special Secretary Pu R. Lalvena pawhin fuihna thu a sawi bawk. He inkhawm hi Sports Department Director thar, Para Military Force hnuaia Adventure Course Training chhuak tawh Pu Lalzirmawia’n kaihruaiin an hriat tur thil pawimawh hrang hrang a hrilh hlawm a ni.