Mizoram M.P. (Lok Sabha) inthlanna chu vawiin khan buaina leh harsatna lian tham thleng awm lovin tluang takin neih a ni a, zing dar 7:00 atanga vote thlak tan hnuah Aizawl District ah chuan VVPAT tlema zawng thlak a ni. VVPAT hi Mizoram pumah 385 hman a ni a, Aizawl District huam chhungah 222 hman a ni. Inthlan zawh hnu ah Polling Party ten chinfel ngai te an tihfel hnuah EVM, VVPAT leh thil pawimawh dang te nen an rawn hawpui nghal a, Aizawl ah chuan tlai dar 6:00 khan Polling Party te hi an rawn thleng tan a, Receiving Counter leh Strong Room siamna hmun Assembly Annexe ah Polling materials te an thehluh fel hnuin EVM te chu Strong Room ah dah luh fel nghal zel an ni. Strong Room hi BSF ten uluk takin an veng reng a, zanin-a Polling Party te an lo thlen fel vek hnuah naktuk zing dar 8:00 ah Strong Room hi Seal a ni ang.

Mizoram puma Polling Station 1126 zinga 884 atanga report dawn tawh ah vote tla zat chu 60.06 % a ni a, Aizawl District bikah chuan vote tla zat hi 58.66 % a ni. Aizawl District huam chhunga Constituency 14 zingah Aizawl South III ah 67.56 % tla-in a sang ber a, Aizawl North-I chu vote tlak hniamna ber niin 52.07 % a tla bawk a ni.