4982/2025-2026
Dated Aizawl, 24th March 2026: Vawiin khan State Tobacco Control Cell, National Tobacco Control Programme, National Health Mission buatsaihin “Training of Trainers for Mizoram Government Dental Surgeon” chu DHME Auditorium-ah neih a ni. He training hi Sawrkar hnuaia Dental Surgeon thawk mek te tan a buatsaih a ni. He training-ah hian Dr. Zoramthangi Renthlei, Additional Director (Dental) cum State Nodal Officer, National Tobacco Control Programme chuan hun hi a kaihruai a; Dr. Zonunmawii Pachuau, Additional Director chu Special Guest a ni.
Dr. Zonunmawii Pachuau chuan thu sawiin ‘Global Adult Tobacco Survey (GATS) 2016-17 in a tarlan danin Mizoram chu vaihlo, zuk leh hmuam ti tam lamah India ram pumah kan sang hle a ni’ a ti a, 58.7% in vaihlo zuk leh hmuam ti kan awm thu a sawi. Hemi piah lamah hian Global Youth Tobacco Survey – 4, kum 2019 a neihin a tarlan danin zirlai kum 13 atanga 15 inkar zingah vaihlo zuk leh hmuam hmang mek hi 58% zet an awm bawk a, nu leh pa ten kan fate vaihlo zuk leh hmuam ti lo tura zirtirna kan pek tam hi a pawimawh tak zet a, mi thiamte chuan ruihhlo hman tanna kailawn (Gateway substance) an tih chu vaihlo zuk leh hmuam hi a ni tiin hriselna a khawih chhiat bakah economy thlengin a nghawng thei a ni tihte kan ngaihtuah a hun tawh hle a ni a ti bawk.
Pu R. Lalremruata, State Consultant, NTCP chuan National Tobacco Control Programme hmalakna hrang hang a tarlang a, Hospital tina Doctor-te hnathawh tur leh an tih tur hrang hrangte leh vaihlo sim thei tur a puih dan tur chungchangte a sawi bawk. Pi Vanlalzari, State Legal Consultant kaihhruaiin NTCP in COTPA 2003 te, PECA 2019 (E-Cigarette khuahkhirhna dan) chungchangte zir hona neih a ni bawk. Pu T. Lalbiaksanga, Programme Assistant, NTCP chuan lawmthu sawiin hun a khar a ni.
