No.2679/2021-2022
Aizawl, 22nd October, 2021 : Nimin 21st October, 2021 (Ningani) khan Delhi a cham mek, Rajya Sabha MP Pu K.Vanlalvena leh Mamit bialtu MLA Pu H.Lalzirliana, Vice Chairman RIDB leh Er.Vanlal Duhsaka, Member RIDB te chuan Union Ministry a Secretary pahnih - Pu Giridhar Aramane Secretary, MoRTH(Ministry of Road, Transport and Highways) leh Pu Tarun Kapoor, Secretary, Petrolium and Natural Gas bakah NHIDCL(National Highways and Infrastructure Development Corporation Ltd) Managing Director Pu Mahmood Ahmad te an hmu a. Mizoram mamawh thil pawimawh te an sawi pui a ni.

Mizoram aiawha Central sawrkar dawrtute hian NH-44A, Sairang to Tripura kawng Central atanga hun rei tak fund release loh avanga zawh hleih theih loh chu a rang thei ang ber a tih fel sak thuai a tul thu te, Bairabi - Mamit Kawngpui chu double lane highwaya siam tur te, Tipaimuk kianga Manipur leh Mizoram inkar Lei(bridge) atana sanction awm tawh hna tan thuai tur te, Tlabung bul Khawthlangtuipui chunga 204 metres a sei, Lei dawh tura DPR siam zawh tawh chu pawmpui tur te, Saisihchhuah panna double lane road siam chungchang te, Aizawl - Tuipang Double lane hi Mizoram chhim tawpa Chhimtuipui kama lawng thlen theihna khua Lomasu thlenga double lane a extend a tul thu te Pu Giridhar Aramane a leh Pu Mahmood Ahmed hnenah te hian an thlen a. Secretary MoRTH chuan Minister aiawhin a lo dawngsawng a. Mizoram MP leh MLA te thu thlen chu a rang thei ang bera bawhzui a nih tur thu a lo hrilh a ni.

Mizoram aiawh te hian Pu Tarun Kapoor, Secretary Petroleum and Natural Gas chu a office chamberah an kawm bawk a. Meidum hmuna Natural gas, ONGC ten an chhut danin 2.28 Billion Standard Cubic Metre(BCM) Natural Gas awm ngeia an hriat chu Mizo mipuite hman theih tura a rang thei ang bera lak chhuah a tul thu te an thlen a. Guwahati - Silchar gas pipeline hi Aizawl thlenga extend tur te, Bairabi leh Sairanga Oil Depot siam turte, Mualkhang Bottling plant tuna khar mek chu a tih lenna tur ram te tih fel thawkhat a nih tawh avangin hmalak thuai nise tih te leh Aizawla CNG Filling Station din tur te in ngen na an thlen bawk a ni.