No.1672/2021-2022

Dated Aizawl 3rd August 2021: Tukin dar 7:45AM khan a vawikhatna atan Horticulture Department leh Clover Organic Pvt. Ltd. te tangkawp buatsaihin kuthnathawktute tharchhuah, Lakhuihthei leh Dragonfruit chu Delhi-a thawnchhuah turin  Pu JC Ramthanga, Addl. Chief Secretary, Horticulture Department chuan Horticulture Centre Chite atangin a vai liam (flag-off) a. Dr. Elizabeth Saipari, Director of Horticulture chuan a hmunah Pu JC Ramthanga, Addl. Chief Secretary hi a lo dawngsawng a ni. 


Pu JC Ramthanga chuan thu sawiin, hripui leng karah ram pumin harsatna tam tak a tawk a, chutih laia thahnem ngai taka kuthnathawkte thawhrimna leh tumruhna a zara Horticulture Department hmasawnna chanchin lawmawm ram in a nei chu ropui a ti a, hripui lenlai leh hun khirhlai pawhin Mizoram chuan horticulture production sang tak a nei thei chu Department hotute leh hnathawktute inpekna a ni, a ti a. Mizoram intodelh pawimawh zia hria a, chawl miahlo a hripui leng kara rim taka kuthnathawktute chungah lawmthu a sawi bawk a. Chite Local Level Task Force ten Horticulture Centre, Chite-a sawrkar SOP zawm chunga programme siam an remtih avang pawhin an chungah lawmthu a sawi nghal bawk a ni. 


Heng thei thar chhuahte hi Air Cargo-in Delhi-ah phur ang a, thei thawn chhuah zawng zawng hi Lakhuihthei  11 qtls. leh Dragonfruit 4qtls. a ni. Lakhuihthei hi 15qtls. thawnchhuah tum a nih laiin Air India in tum khatah 15qtls. chauh an phurh theih avangin 4 qtls. dang hi naktuk ni 4/8/2021 ah thawn leh tum a ni bawk  a ni. 


Lakhuihthei hi Tuichangral FPC hnuaia Sialhawk khuate tharchhuah niin, anni hi Horticulture Department leh Mission Organic Value Chain Development for Northeast Region (MOVCDNER) hnuaia kuthnathawktu intelkhawm an ni a. Dragon fruit hi Horticulture Department hnuaia farmer thlanchhuahte thar a ni. Variety chi hnih a sen leh a var thawnchhuah a ni a, Dragonfruit sen hi Kolasib atanga tharchhuah a ni a, a var hi Kawlkulh khua atanga tharchhuah a ni bawk. 


Covid-19 hrileng avangin Mizoram kuthnathawktute chuan an tharchhuah hralhna turah harsatna tam tak an tawk a. Horticulture Department chuan heng harsatnate hi ngai pawimawhin kuthnathawktute tharchhuah hi man man zawka hralhchhuak thei turin ruahmanna siam chhoh zel a tum a, Clover Organic, Mizoram Team te nen pawh thawhho zel theih an beisei a ni.

Attachment

  • Loading attachment...