Bamboo Development Agency (Industries Dept.) leh National Bamboo Mission Society (Environment & Forests Dept) tangkawpa buatsaih Mizoram Bamboo Day vawi 2-na chu vawiin chawhma dar 9:30 khan Assembly Conference Hall ah Home Minister Pu R.Lalzirliana’n a hawng.

Bamboo Day hawnna thu sawiin Minister Pu R.Lalzirliana chuan Bamboo Day chu mau thatna leh tangkaina te inzirtir thar nana buatsaih a nih thu a sawifiah a, khawtlang tana hmasawnna thlen thei a nih thu te a tarlang bawk. Mau chu in sak nan leh thiamhnang deh chhuah mai bakah ei/in atan thleng pawha hman theih a nih avangin hetiang kawngah hian man man zawk leh a hlutna tipung zawnga kan siam chhuah thiam a pawimawh a, chumi kawngah chuan mithiam te zirtirna pawh tun aia nasa zawkin kan mamawh dawn a ni, a ti. Mizoram chhungah mau atanga hlawkna tam zawk kan hmuh theihna tur te, tun aia tangkai zawka state chhunga kan sawngbawl theih zawk beiseina avangin state pawna tam tham hralh chhuah pawh khap rih a nih thu sawiin Home Minister chuan mau chin leh sawngbawl te chu Mizoram Sorkar flagship programme NLUP ah pawh telh a ni, a ti. Bamboo Day puala mau thatna leh sumhnar tam zawk peipunna tur bakah chhehvel boruak humhalh nana a thatzia lam hawia Seminar neih chhunzawm tur pawh chu hlawkthlak taka helam kawnga tui mi ten an hman theih nan a duhsakna thu Home Minister chuan a sawi nghal a ni. Bamboo Day puala mau hmanga thilsiam thiamthil chi hrang hrang phochhuahna Exhibition ni thum awh tur pawh Khuallian a hian a hawng nghal a ni. Bamboo Exhibition ah hian Stall 25 siam a ni a, Mizoram pawnlam atang pawhin firm engemaw zat an lo tel a ni.

Bamboo Day vawi 2-na hawnna inkhawm hi Principal Secretary Industries Pu P.C.Lallawmsanga’n a kaihruai a. Khualzahawm Industries Minister Pu S.Hiato chuan tunlai khawvelah mau hlutna a pun zel karah hian mau chin uar te humhalh leh a tangkai zia inzirtirna sorkar leh NGO ang pawhin chak taka kalpui a nih dan a sawi a, state chhung sumpai tipung thei a nih avangin tlangram lo neihin nasa taka mau a tihchereu thin chu theihpatawpa dolet turin tan lak mek a ni, a ti.

Khualzahawm Environment & Forests Minister Pu H.Rohluna pawhin hawnna inkhawmah hian thusawiin Mizoram chu thing leh mau that duhna ram ngaw nei zau tak a nih thu te, mautam avanga mau tam tak chereu thartawhlehna tura programme kalpui pawh thui taka a hlawhltin tawh thu te, NLUP hnuaiah chhungkaw 2500 lai mau chintir mek an nih thu te, mau sawngbawl leh mau hlutna zirtir kawnga Lengpuiah Bamboo Training Centre din tum mek a nih thu te, mau hmang tangkaia mitthi kuang thahnem tawk tak siamchhuah bakah kumin ah ngei pawh a aia tam siamchhuah tura hmalak mek a nih thu te a sawi a ni.

Vawiin chawhnu lam hian Bamboo Development for Increasing People’s Economic Potential and Environmental Conservation tih thupui hmangin Seminar neih zui nghal a ni a, Seminar ah hian mithiam thlanchhuah - Pi Manjula Saikia, National Consultant, United Nations Industrial Development Organization (UNIDO), Guwahati, Pi Neera Sarmah, Director, Bamboo Village, Kolkata, Pu Ghani Zaman, Training Consultant, Department of Handicraft & Handloom, Government of Sikkim, Pu Pratap Goswami, Chief Executive, Cachar Paper Mill te bakah tualchhung atangin mi thlanchhuah ten an zirtir a ni.

2nd Bamboo Day puala intihsiakna hrang hrang lawmman dawngtute hnenah Khualian-in lawmman a sem nghal a, hengte hi lawmman dawngtu te chu an ni :

1. Best Bamboo Entrepreneur (mipa) - Pu Charlie Lalthlenmawia, Heritage, Mizoram

2. Best Bamboo Entrepreneur (hmeichhia) - Pi Kaphnuni, KZ Handicrafts Centre, Chite

3. Innovative Bamboo Product - Activated Bamboo Charcoal & Vinegar, SK Bam- -boo Vinegar, Chhingchhip.

4. Best Bamboo Campaign Award - Tualte Branch YMA

5. Special Artistic Recognition - Pi Zopari, G&M Handmade Industry

6. Hla inphuahsiak - Pu Lalhualhima Kawlni, Ramhlun Vengthar, Aizawl.

7. Essay inziahsiak - Pi Miriam Ramhmachhuani, Saitual