Vawiin chawhnu dar 1.30 khan Mizoram Bharat Scouts & Guides chuan Chief Minister Bangla-ah State Council Meeting an nei a; he meeting hi an pawl President Pu Lal Thanhawla chuan a kaihruai a; Vice-President, Education Minister Pu Lalsawta pawhin a hmanpui a ni.

He meeting-ah hian Pi K. Lalliantluangi, State Secretary chuan kum 2011-2012 chhunga Mizoram Bharat Scouts & Guides thiltihte report a pe a. Kum 2011-12 chhung khan State Level-ah training vawi 10 buatsaih a ni a; hetah hian Scoutmaster te, Guide Captain te, Scouts leh Guides naupang 500 velin training chi hrang hrang an zo a ni. Mizoram Bharat Scouts & Guides chuan hmar-chhak bial huapa programme leh training chi hrang hrang 12-ah aiawh a tir bawk a; National level-a programme chi hrang hrang 26-ah intirhchhuah a ni a; International level-ah pawh Mizoram Bharat Scouts & Guides hi tum 2 an tel ve a ni. Kumin 18th-24th January, 2012 chhung khan national Integration Camp chu State Training Centre, Tanhril-ah hlawhtling takin neih a ni a; hetah hian State 23 atangin palai 416 an tel a ni.

Vawiina State Council Meeting-ah hian kum 2012-2013 chhunga programme duan lawk – State level a neih tur chi 31 te, Regional Level-a neih tur programme 18 leh National level programme 45 te chu chhawpchhuah a, lungrual taka pawm a ni. Hemi bakah hian World Guiding kum 100 tlin lawmna kum thum awha hman mek chu Mizoram-ah pawh a kharna hun buatsaih ni se tia rel a ni.