No.496/2021-2022 

Aizawl, 13^th May, 2021 : Vawiin khan Supply Minister Pu K. Lalrinliana hovin a pisaah Supply department officer-ten COVID – 19 hripui leng mek kara Mizoram mipuiten buhfai an chan tur ang pangngai taka an hmuh theih nana hmalak dan tur an sawiho.

Meetingah hian Supply department-in nasa taka monsoon stock a kalpui vangin tun dinhmunah chuan Mizoram hmun hrang hranga supply kudamah buhfai a awm tha tawk tih tarlan a ni a, tun thla kal lai mek May, 2021 chhunga buhfai sem chhuah tur quota pawh Director, FCS&CA in May ni 7, 2021 khan allotment tichhuakin, retailer tin ten an quota theuh a hun taka an lak chhuaha an sem tluan  theih chuan COVID – 19 hrileng vanga  buhfai harsatna tawk an awmlo tura ngaih a ni. 

May, 2021 quota sem rual hian PMGKAY hnuaia NFSA beneficiary – AAY leh PHH beneficiary tin ten Kg 5 theuh a thlawna an hmuh tur pawh sem nghal a nih dawn thu tarlan a ni bawk.