No.445/2021-2022
Aizawl the 8th May, 2021 : COVID-19 hri leng darh zau zel avangin Ministry of Environment, Forests & Climate Change, Government of India chuan India rama National Park leh Sanctuary zawng zawngte kharna thupek a tichhuak ta. He Order hi 30th April 2021 a tih chhuah niin thuleh awm hma chu National Park, Sanctuary leh Protected Area reng reng, Tourist te tlawhpawh khap tlat a ni.
Researcher leh thawktu staff te pawh Protected Area Manager te remruat huangchhungah chauh fimkhur taka chet vel tur a ni. Field staff duty turte pawh COVID-19 negative an ni tur a ni a, fimkhurna kawng tinrengah sorkar thuchhuak dinglaite an zawm tur a ni.
He thupek hi mihring leh ramsate inkara COVID-19 virus inkaichhawn theih venthawnna atana chhuah a ni. Ministry Order behchhanin Mizoram ah pawh hetiang khapna Order hi Chief Wildlife Warden chuan 3rd May, 2021 khan a tichhuak ve bawk a ni.
He Order a din chhung zawng hian mi tumahin Mizoram chhunga National Park leh Sanctuary kan neihte tlawhpawh lo turin kan in hriattir e.
