Mizoram chhunga/Telecom Service tih changtlunna turin nimin khan Chief Minister Pu Lal Thanhawla hovin a office-ah meeting neih a ni a, he meeting-ah hian Pu D.P.Singh, CGM, NE-I Circle, BSNL, Shillong; Pu Lalram Thanga, Principal Secretary to Chief Minister; Pu R.K.Gupta, Secretary (Power & Electricity) leh Pu C. Lalhmachhuana, Secretary (Information & Communication Technology) te bakah official pawimawh engemawzat an tel.

Chief Minister Pu Lal Thanhawla chuan Mizoram hi North East state zinga IT lama hmasawn leh changtlung ber a nih theih thu a sawi a. Hmun kilkhawr zawk leh Border Area-ah mobile service tha neih a tul thu sawiin BSNL hotute hma la turin a ngen. Corruption dona atan IT a tangkai theih dan te leh chumi atana e-Governance project hrang hrang pawh chak taka kalpui anih thu a sawi a. Taxation Department-in Online Tax Payment an siam hnuah tax collection a pun tak thute a sawi lang bawk.

Pu D.P. Singh chuan Aizawl atanga Kolkata BSNL direct connection, 10 Gbps lai mai chu thla hnih chhunga peih hman anih tur thu a sawi a. Hei hian BSNL mobile service mai bakah Internet broadband service a that phah tura ngaih a ni. He meeting-ah hian district hrang hranga telecom service tha zawk neihna turin OPGW (Optical Fibre Ground Wire) Power line-a thlun dan tur chung changte sawiho a ni.