4553/2024-2025

Siaha the 6th March 2025: Vawiin chawhma dar 10:30 khan DRDO Conference Hall, Siaha-ah Right to Information (RTI) chungchang inhrilhhriatna chu Pu Dolianbuaia, Secretary, MIC kaihhruaina hnuaiah neih a ni a, Pu John Neihlaia, IPS Rtd, Chief Information Commissioner (CIC), Mizoram Information Commission chuan keynote address pein he hun hi a hmanpui a ni.

Pu John Neihlaia chuan vawiina kalkhawm, State Public Information Officer (SPIO) leh State Assistant Public Information Officer (SAPIO)te chu mawhphurhna pawimawh tak chelhtute an ni a, RTI chungchanga midang hrilh chhawngtu nih tum theuh turin a sawm. Right to Information (RTI) Act 2005 leh a kaihhnawih Dan leh Dun (rules lẹh guidelines) te chu langtlang sawrkar a awm theih nan lẹh mipuiin sawrkar atanga an hriat duh zawngte an hriat theihna tura India Danpuiin a khua leh tui te tana dikna chanvo a pek a ni a, ngaih pawimawh hle tur a ni, a ti.  India in zalenna a hmuh hma leh RTI duan a nih hma chuan mipui hriat thiang loh tam tak a awm thin a ,  Kum tam tak hnuah mi thahnemngaite zarah RTI Act chu 2005 khan pawm niin June 2006 khan hman tan a ni, a ti.

Mizoram CIC chuan RTI Act chu mipui pawhin hlut nachang an hre chho zel a, kum 2022 July Ni 1 atanga Online RTI hman tan a nih hnu phei chuan zawhna thahnem tak a luh tawh thu tarlangin mipuiin an dikna chanvo pawimawhna an hre zual zel chu thil lawmawm tak a ni, a tibawk. Kumin January Ni 1 atangin RTI application 1216 lại a lut tawh tih tarlangin chu chu chawhrualin nitin RTI application 19 lut ziah ang a ni, a ti.

India khua leh tui mi tupawhin RTI hmanga zawhna a zawhin chhanna a hmuh loh emaw, chhanna a hmuha a lungawilohin Departmental Appellate Authority (DAA) ah zualko vawikhatna (1^st appeal) a thlen thei a, chuta a la lungawiloh chuan zualko vawihnihna (2^nd appeal) chu Commission a thlen theih thin thu a tarlang. Pu John Neihlaia chuan Siaha District atangin Commission thleng RTI an dawng khat hle a ti a, thawktu SPIO/SAPIO te an thawktha hle emaw mipuiin RTI chungchang an la hre zau tawk lo emaw a ni tiin zau zawka mipui hriata puanzar a tul hle a ti bawk. 

Pu H Dolianbuaia, Secretary MIC chuan PowerPoint presentation hmangin RTI Act 2005 chungchang zirtirna a pe a. Kalkhawmte hnen atangin zawhna lẹh chhannna hun te buatsaih niin hun hlawkthlak tak hman ho a ni.

District Bawrhsap Pu VL Hruaizela Khiangte chuan RTI chungchanga hrechiang ber tu leh a taka thawktu ten training pawimawh tak pe tura an lo kal chu lawmawm a tih thu a sawi. RTI chu sawrkar khalhngiltu tur a nih angin rilru thianghlim tak nen hmang theuh turin a sawm bawk a ni. 

RTI Training-ah hian Siaha District chhunga department hrang hrang hnuaia RTI mawhphurhna changtu SPIO leh SAPIO te an kalkhawm a ni.