MIZORAM CHIEF MINISTER KRISMAS LEH KUMTHAR THUCHAH
Mizoram mipui zawng zawngte u, kumin kum 2021 Krismas leh Kumthar lo thleng tur atan chibai ka buk vek a che u.
Kan hriat ţheuh angin, Covid hripui lengin Mizoram leh Khawvel pumpui nasa taka a tih buai avangin kan duh ang leh tum angin Krismas leh Kumthar pawh kan hmang thei dawn lo a, a pawi kan ti tlang em em a nih hi. Amaherawhchu, Pathian remruatna leh rorelna a nih miau si avangin hriat thiam dan zawng a, a aw leh a thusawi kan ngaihthlakthiam a ngai a ni. Mizoram leh a chhunga chengte hi Kristian ram leh Amah ringtute ni mah ila khawvel tawrh tur a Pathian rorelna chu kan pumpelh thei bik hauh lo a, Khawvel mipui dang te ang bawkin he hripui hi nasa takin kan tuar ve tho a ni tih i hre bawk ang u.
He Covid hripui leng avang hian kan nunphung zawng zawng a danglam vek a, kan ram hmasawnna chi hrang hrang leh development hna ruahman leh hmachhawp kan neihte pawh a chawl deuh ţhuap mai a nih hi. Hri a len tirh khan khawvel ina kan tum ber chu a tam thei ang ber thi lova dam khawchhuah a ni a. Kum hnih dawn lai a liam hnu chuan zawi zawiin a do dan te leh invendan te kan thiam ve zel a. Nunphung inher rem dan leh development pawhin tlem tlemin hma a sawn chho ve thei ta zel a nih hi.
Keipawh tunhnai November thla a Delhi a ka zuk zin a Sawrkar laipui hruaitute nen kan indawr danah pawh lawmawm ka ti in beiseina thui tak ka nei a. Pathian tanpuina in kum thar lo awm tur ah chuan kan ramin engemaw chen hmasawnna leh ke penna pawh a neih zel ka beisei.
Krismas leh Kumthar lo awm tur ah hian Biak Inah inkhawm thei tawh mah ila, Doctor te leh mithiamte thurawn angin Pathian faka zai chu a him ber rih lo a. Hlim taka Pathian faka chawimawina hla sak hi nuam kan tih leh kan chak ber pakhat chu a ni tehmeuh mai. Amaherawhchu a theih tak si lovah chuan Pathian chawimawina chi danga kan chawimawi a ţul ta a. Isua nu Mari’n a sawi angin “Ka nun in Lalpa a chawimawi e” kan tih a lo ţul ta zawk a nih hi. Pathian in hun ţha min la pe ang a. Hlim taka zaiin Pathian kan la chawimawi leh thei thuai ang tih beiseiin a hnenah pawh ţawngtaiin i dil zel ang u.
A tawp berah chuan Pathian in Aigupta rama hremna hripui sawm a lentir lai khan Israel fate ram dangah a thiar fihlim chuang lo a, Aigupta ramah an la cheng ho tho a ni. Amaherawhchu ramtiam Kanan ram pana dam taka chhuak tur chuan Kalhlen Kut beramno thisen in an kawngkhar biangah an tah sen ngei ngei a ngai a. Israel fate ni eng ang mahsela, beramno thisen a an kawngka biang an tah sen loh chuan thihna hripui in a kalhlen hauh lova ni. Hetiang ang hian keini pawhin kan chatuan kanan ram kan pan dawn chuan Kalhlen Kut beramno thisena sil fai ngei ngei kan ngai a ni tih hre nawn leh i la. He Covid hripui a kum tela khawvel min chimtu hian min hriattir nawn leh a ni tih hriain tun krismas leh kumthar hun hi hlawk takin hmang ila. “I chhiahhlawh hriat turin thu sawi rawh” ti in Lalpa kan Pathian aw ngaihthlak nan i hmang ţheuh zawk ang u.
Krismas leh Kumthar hlim leh dam taka kan hman ţheuh theih nan Zoram mipui zawng zawng duhsakna chibai ka buk a che u.
Ka lawm e.
