3421/2022-2023
Aizawl the 31st January 2023 : Vawiin chawhnu khan Aizawl Sipai Lammualah North Eastern Council Golden Jubilee ropui takin lawm a ni a. Chief Minister Pu Zoramthanga chu khuallian niin Mizoram State Planning Board Vice Chairman Pu H Rammawi chu khual zahawm a ni.

Chief Minister Pu Zoramthanga chuan North Eastern Council Golden Jubilee lawmnaa kalkhawm te chibai a buk a; Pathianin malsawmna min pek NEC chu tungnung a, tichangkangin, i kalpui zel ang u tiin mipuite a sawm a ni. India hmarchhak State te tan Sawrkar Laipui chuan a bikin pawisa a sanction thin a, hmasawnna sum thalna khurbik kan nei a, NEC avang hian Mizoram leh hmarchhak state ten kawng hrang hrangah hmasawnna kan neih phah hi a lawmin a ropui em em a ni, Chief Minister chuan a ti a. North East State te zingah Mizoram chu state lian ber leh mipui tam berna ni lo mahse state dangte entawntlakin kan siam thei a ni, a ti. Mizoram chu lehkhathiam rual awm khawmna, khawtlang inpumkhat leh tanrualna ram a ni a, state dang te tan rinawmna leh inhmangaihna kawngah te, tlawmngaihnaah te entawn turin awm zel ila, Mizoram hi a hmahruaitu ah tan tum ila, tiin ram mipui te Chief Minister chuan a fuih a. Tunah pawh remna entir nan ram ralmuang ber kan ni a, kawng chi tinrengah entawn turin kan theih tawpin i bei zel ang u, tiin a sawm a ni.

Khual zahawm Pu H.Rammawi pawhin thu sawiin India sawrkar chuan hmar chhak state te hmasawnna turin sum leh pai kum tin kan ta tur bik a dah hrang a, hamthatna kan dawn theih nan NEC leh DoNER Ministry te min siam sak a. Mizoram leh India hmarchhak state te tan chuan North Eastern Council hi a hlu hle a ni tiin Golden Jubilee ropui taka lawm hi a phu takzet a ni, a ti bawk.

NEC hmunpui Shillong-ah Prime Minister Pu Narendra Modi hovin December ni 18, 2022 khan NEC Golden Jubilee lawmna neih a lo ni tawh a, north east state hrang hrangah tunah hian a lawmna neih leh mek a ni.

NEC Golden Jubilee lawmna pualin Tug-of-war intihsiak buatsaih a ni a. Mipa team 55 tel zingah lawmman pakhatna dawngtu Durtlang North, pahnihna dawngtu Sihphir leh pathumna lawmman dawngtu Leitan an ni a. Hmeichhia team 16 zingah Durtlang North pakhatna niin Zemabawk North pahnihna, Sihphir pathumna an ni a. Vawiin programme-ah hian khuallian Chief Minister Pu Zoramthanga chuan lawmman te hi a sem a ni.

Vawiin programme ah hian Planning Secretary Pu Lalmalsawma Pachuau chuan kalkhawm te lawmna thu a sawi a. Mizoram State Sports Council Secretary Pu John Tanpuia’n lawmthu sawiin hun hnung a khar a ni.