866/2025-2026

Aizawl dated 20th June 2025: Vawiin chawhma khan Chief Secretary’s Conference Hall, MINECO-ah Mizorama PM Vishwakarma Scheme kalpui dan thlirletna (review meeting) neih a ni a. Chief Secretary Pu H. Lalengmawia’n thlirletna hun hi a kaihruaiin Dr Lalzirmawia Chhangte, Commissioner & Secretary Commerce and Industries, Director LESDE, Joint Secretary, Commerce and Industries, District-tin a Deputy Commissioner-te, State Level Bankers Committee Coordinator, NSDC State Coordinator, Chairperson Mizoram Rural Bank leh official dangte an tel a ni.

PM Vishwakarma hi Central Sector Scheme niin September ni 17, 2023 khan kalpui tan a ni a. India rama kutthemthiamte (Artisans and Craftsmen) tihhmasawnna leh khaichhuahna tura duan a ni.
He scheme hi Ministry of Micro, Small and Medium Enterprises (MoMSME), Ministry of Skill Development and Entrepreneurship (MSDE) leh Department of Financial Services (DFS), Ministry of Finance (MoF), Government of India te thawhhona hnuaia kalpui ruahman a ni.

PM Vishwakarma in a thiltumte chu:
(i) Kutthemthiamte thiamna hriatpuia, he scheme hnuaia hamthatna awm te hmang thei tura tanpui.
(ii) Tunlai khawvel mila an thiamna te belhchhah.
(iii)An theihna leh thilsiam quality belhchhah tura tanpui leh hnathawhna hmanraw changkang zawk ngaihtuah sak.
(iv) Dahkham awm lo leh a punna hniam zawka loan awlsam taka an lak theihna tura tanpui.
(v) Digital transaction an hman tam theihna tura ruahmanna siamsak leh
(vi) An thilsiam chhuahte hralh chhuahna kawnga tanpui te a ni.
Mizoram pum leh district tin atanga tanpuina dawng thei tura inziaklut zat chu hetiang hi a ni:

i)State pum huapa application dawn tawh zat: 10740
ii)Stage 1 a pawm zat: 7900
iii)Stage 2 a pawm zat: 7269 leh
iv) Stage 3 a pawm zat : 3297 te an ni

Dilna te enfiah leh pawmpui tur hian endikna hrang hrang chi thum (3) paltlang a ngai a, chungte chu:
Stage 1: Village Council President emaw Local Council Chairman in PM Vishwakarma portal a inziaklut te chu online in thliar felin, an finfiah thin a.

Stage 2: VCP emaw Local Council Chairman emaw in dilna an enfiah te chu online in District Implementation Committee hnenah a thawn a. Chung dilna te chu District Implementation Committee te’n lo enfiah lehin a recommend leh thin a ni.

Stage 3: Dilna te a tawpa pawmpuitu tur chu Screening Committee a ni.

Serchhip, Lunglei leh Khawzawl district te chu Mizoram chhunga PM Vishwakarma Scheme hnuaia registration nei tha zual te an ni.

Meeting ah hian tanpuina dil tura inziaklut te loan lak atanga a pung rulh tur zat ngaihdam (interest subvention) leh bank nen a inthlunzawnna tha siamsak (credit linkage) bakah tha zawk leh chak zawka district tinah skilling leh training kalpui dan tur rel a ni.

Chairman Pu H. Lalengmawia chuan PM Vishwakarma scheme a lo hlawhtlin lehzual nan, Deputy Commissioner tin te chu ngun tak leh ngawrh taka District Implementation Committee kaltlanga hma la turin a chah a. Local Council leh Village Council te nen tha taka thawk ho zel turin a chah bawk.