1914/2025-2026
Dated Kolasib the 14th October, 2025: Mizoram Cleanliness Competition neih tura inbuatsaihna atan UD&PA chuan Kolasib Town area-ah fai inelna an buatsaih mek a, hemi atana endiktu tura ruatte chu vawiin khan DUDO Conference Hall, Brig C. Vankunga Shopping Centre, Diakkawn-ah kohkhawm niin briefing neih a ni.
Hun kaihruaitu Pi Josephine Zonunsangi, DUDO chuan kum 2019 khan Kolasib chu khawpui fai inelna ah Top 3 ah langin khami hnu lamah khan dinhmun sang tak a thleng leh tawh lova, hei vang hian khawpui fai ni tura ṭan an lak nasat thu a sawi. Kum dangah Faina Hapta pualin inelna hrang hrang buatsaih ṭhin chu tunah Mizoram Cleanliness Competition pualin kalpui a nih tawh thu leh Kolasib chu Mizoram khawpui fai ni thei tura hmalakpui atan kalkhawmte a sawm nghal bawk a ni.
Briefing hunah hian Pi Lalkhawngaihi, Inspector of Sanitation chuan Mizoram Cleanliness Competition-a inelna chu category pathumah ṭhen a nih thu sawiin Municipal Area (AMC leh Lunglei Municipal), District Capital 9 te leh Urban Town 17 ten inelna an nei ṭhin tih a sawi. "Kum 2024 khan Kolasib chu District capital zingah 8-na kan ni a, a tawp ber dawttu kan ni a, faina kawngah kumtin a hnung tawlh zawngin kan kal a ni," a ti a, kumin Mizoram Cleanliness Competition neih turah ṭan kan lak chuan dinhmun sang takah Kolasib chu kan hlangkai thei tih a sawi.
Inspector of Sanitation tarlan danin Kolasib fai inelna atan hian inelna hrang hrang (category) 7 — Vengfai, Sorkar Office fai, Bazar hmun fai, Hotel, Restaurant & Tea Stall fai leh zirna (Institution) in fai ah te competition hi neih tur niin zirna in bik hi Primary & Middle - Elimentary School leh High School chin chunglamah te ṭhenin endiktute pawh a hrang ruat an ni.
Kolasib khawpui chhung fai inelna ah hian Kolasib Officers' Club leh Education Department bakah Sub Hqrs YMA leh MHIP, District MUP te leh Kolasib District MJA te chu endiktu atan ruat an ni a, briefing-ah hian endikna tehfung (criteria) siam hrang hrangte leh faina kawnga hmasawnna turte sawi ho nghal a ni bawk.
