2655/2024-2025

Dated Lawngtlai, 23rd October 2024 : Urban Development & Poverty Alleviation (UDPA),Lawngtlai District bultimin vawiin chawhma dar 11 khan 'Mizoram Cleanliness Competition 2024' atana hmalak dan tur ngaihtuaha  thutkhawmna DC Conference Hall-ah neih a ni a. Pu Zoramsiama Hmar, Addl.DC chuan thutkhawm  hi a kaihruai.

Pu Zoramsiama Hmar chuan kalkhawmte hnena  lawmthu sawina a nei hmasa a. India ram  hun rei tak chhung faina lama a hnufual hnuah tan la tharin, kum 2015 atang khan faina beihpui thlakin 'Swachh Bharat Abhiyan (SBA)' a lo kalpui tan ta a ni, a ti a. Mizoramah pawh  Urban Development & Poverty Alleviation (UD&PA) hmalaknain Urban Town- 23 ah  kalpui a nih thu a tarlang. Kum- 2017 atang khan tehfung hrang hrang hmanga  Faina inelna ( Mizoram Cleanliness Competition) kalpui tan a nih thu sawiin Addl. DC chuan Lawngtlai district dinhmun thlirin  hmalakna turah theihtawp chhuah a tul tak zet a ti. Nikum lama Faina inelnaah Lawngtlai District chu Mizoram pumpuiah 6- na a nih thu tarlangin, Pu Zoramsiama Hmar chuan hei hian  kuminah dinhmun tha zawk nei tura hmalak a tul zia a tilang chiang hle a ti.

Pu Zoramsiama Hmar chuan Faina Inelnaa tehfung hrang hrangah eng tehfung berah nge kan hnufual tih hre turin tehfung hrang hrangte zir chian  a tul hle a ti a. Tehfunga hnufualna bikah  theihtawp chhuaha hma lak  a pawimawh hle dawn  tih sawiin, mimal, Tlawmngai Pawl, Sawrkar department hrang hrang leh Village Council - te  thawhhona tha a awm a tul hle a ti. Mizoram Cleanliness Competition-  chu India ram khawpui fai inelna 'Swachh Survekshan'  atana inbuatsaihna tangkai tak a nih bawk avangin Addl. DC chuan Lawngtlai khawpuiin Mizoram mai bakah India ram khawpui fai inelnaa dinhmun tha zawk a hauh theihna tura  theihtawp chhuah turin kalkhawmte leh lawngtlai mipuite  a sawm nghal a ni.

Pi Margaret J. Vanlalremmawii, DPO, UD&PA, chuan Agenda sawifiahna neiin, hmalak dan tur sawihona neih nghal  a ni a. Mimal, Sawrkar leh vantlang ram fai taka enkawl nise tih niin, Zirna In zawng zawngah Awareness kalpui a, Zirna In leh a chhehvel tihfai ni bawk se an ti a. Vantlang zun In leh êk In tihfai leh thianghlim taka enkawl ni se, hman khat daih sarâng hmang lo tura inzirtirna uar tak kalpui bakah khauh zawka endik thin ni se an ti a.  Tuihâwk luan kawr tha taka en kawl ni se, tui tling awm theihna ang angte endik a, a tul ang a hmalak ni se; Lawngtlai khawpui chhunga zirna In, Restaurants, Hotels, leh Office zawng zawngah Faina inelna kalpui a, endiktu ruat ten endik ni bawk se an ti.  Lawnglai District chhunga Village Council (VC), Kohhran  leh Tlawmngai pawl zawng zawngte nen thawhhona tha tak neih ni se, Lawngtlai khawpuiin  Faina leh thianghlimna kawnga  rahbi thar kai turin theihtawp chhuah chhunzawm zel ni se an ti bawk.

Vawiin thutkhawmah hian Project Director (PD), DRDO, District Project Officer (DPO), UD&PA , Sr. Chief Medical Officer, Executive Secretary (ES) LADC, Elementary Education Officer (M/S) LADC, Child Development Project Officer (CDPO) ICDS,  Manager, Lead Bank Office, PHED,PWD,DEO- aiawh bakah Kohhran, Tlawmngai Pawl hrang hrang leh Village Council ( VC) ai awhte an tel thei a ni.