Nimin chawhnu khan Mizoram College of Nursing (MCON) in Falkawn ah kumin 2013 a Graduate thar mi 29 te tan Lamp Lighting Ceremony an hmang. He hun hi Principal Director Health & Family Welfare Pu Lalrinliana Sailo chuan khuallian niin a hmanpui.

Khuallian chuan kan motto te hi Mizo tlawmngaihna nen kan kalpui thin a, ngainat kan hlawh bik thin, hei hi i chhawm nung zel ang u a ti. Kan khawsak phung hi damlo te tan damdawi nih tling turin kan awmna apiangah awm ang che u tiin fuih . Nitin in zir belh zel tur kan nei tih hriain intuai thar zel ang u, a ti bawk. Graduate tharte khawi hmunah pawh in hnathawhna apiangah MCON hmel lanna in ni tih hriain, mite tan malsawmna nih tum zel turin a chah bawk. Pu Lalrinliana Sailo chuan MCON in hma a sawn zel theihna turin a theihna kawng hrang hrang ah ngaihtuah zel a tum thu a sawi bawk.

Bati chhi a thutiam lakna hun hi Pi Lalthari Ralte, Principal Nursing Officer Retired in a hmanpui a, Graduate thar te tan fuihna thu tha tak tak a sawi bawk.

Mizoram College of Nursing (MCON) hi Nursing School atangin 11th October, 2005 khan Nursing College puitling ah hlan kai a ni a. Tunah hian Falkawn ah mahni puala building thar neiin zirlai 1st Yr. to 4th Yr. Class ah student 30 theuh an vaiin zirlai 120 in B.Sc. Nursing Course an zir mek a ni.

He college atang hian zirlai 144 laiin tha tak a pass chhuak tawh in India ram khawpui Hospital lian hrang hrang ah leh Foreign thlengin hna an thawk mek a, Army Officer ah pawh mi 2 an lut tawh bawk. Mizo Hmeichhia te pawh in mahni ke a dinna atan he College hi an chhawr tangkai hle zel dawn in a lang.

Tuna pass chhuak thar te pawh hi Appolo Glinegals, Kolkata a hnathawk tura appointment hmusa vek an ni.