1702/2026-2027 

Dated Aizawl, the 8th August 2026 : Mizoram Consumers’ Union te chuan tukin zing khan Dawrpui Taxi Stand-ah Mobile Consumer Checkpost an buatsaih a, mipui mimir ten an thil lei a buk dik leh dik loh leh a man dik tak (MRP) in an lei em tih an enfiah sak a, hemi kawngah hian mipuite an zirtir bawk. Buk dik lo leh a man dik lo te chu Mizoram Consumers’ Union te hian bawhzui zel an tum a ni. A endikna hmunah hian certified weighing scale chhawp a ni a, Legal Metrology lam atangin Inspector leh Manual Assistant te an tel bawk a ni.

Consumer Protection Act, 2019 chungchang tlem tarlan a ni: 

Tunge Consumer chu?

Consumer chu mi tupawh, sum senga bungrua emaw services emaw leitu leh hmangtu zawng zawng te hi an ni. Hralh leh chhawn tur a leitu leh Sawmdawngte a huam ve lo. ('Services' tih hian eg: Electric Connection, Courier leh Post service, bank, insurance, Airline leh taxi, Private Hospital services leh a dangte a huam a ni) (Sec2(7))

Consumer-te Rights or an chanvo paruk te

i) Bungrua leh service him lo leh fel lo laka consumer-te ven him (Right to Safety).

ii) Kan thil lei tur chu, a that dan, a tam lam, a man zat, a thianghlim/tak dan etc hrilh hriat te (Right to be Informed).

iii) Consumer-in zalen taka duhthlan theihna leh a duhzawng lei emaw thlan theihna a nei a ni (Right to choose).

iv) Consumer-in a thil lei a lungawilohna te a thlen in consumer court/ comission in lo ngaihthlak sak chu a chanvo a ni (Right to be heard).

v) Consumer-in a thil leia lungawilohna a neihin pawisa emaw a thawi dam leh zangngadawmna ngaihtuah sak tura phut theihna chu a chanvo a ni (Right to seek Redressal).

vi) Consumer-te an dikna leh chanvo hrilh hriat chu an chanvo a ni (Right to

consumer awareness).

Heng consumer rights chi hrang hrang paruk te hi pal zut sak anih chuan District Commission/ State Commission-ah consumer ten Complaint theh luh theih a ni.

Consumer-in complaint a siam theih dangte

i) Defective goods: Bungrua leh Service, a thar lei, tha si lo leh felhlel a nihin. Tin, a bur (a pack-na) fel lo, a chhung khawih chingpen. (Eg: Gas bur tih chingpen, Mobile Handset, a thar lei ni si hman theih loh te)

ii) Deficiency in Service-ah: Service tha lo leh fel lo te, a service or supply tih khawtlai avanga, consumer-in a tuar in (an in fakmawina leh an in zawrhna anga tih a nih loh in). Tin,Sawrkar/Company thuchhuak leh guidelines anga tih a nih loh in.

iii) Unfair Trade Practices-ah: A MRP aia sang a in lei tir, a printed price tih chingpen leh a aia to a hralh a nih in. Bungraw Pack-na tih dang lam leh rate thup bo te, a manzat hriat theih lohva siam te leh a packna tel lova thil zawrh leh hralh te, pawlh dal te, company-in free gift a siam pe tel lova hralh te an nihin.

iv) E-Commerce leh Online Shopping-ah te thil chah chu dan ang taka home-delivery pek a nih lovin. Consumer in a thil chah chu a chah ang ni lo emaw a size dik lo emaw him lo emaw a nih in pek let (return) theihna dan a awm ngei tur a ni.

v) Bukna leh tehna diklo a in lei tir a nih in. 

vi) Thil hlui chei thar, a thar ang a in lei tir a nih in.

vii) Sumdawng ten an thil zawrh uchuak taka fak mawi/advertise a, an infak ang a

a nih leh si loh in unfair trade practice, misleading advertisement te.

viii) The Consumer Protection (General) Rules 2020 Section 5 in a sawi angin

bungrua leh service hralhtu ten dan ang takin invoice, bill, cash memo leh receipt te an pe chhuak ngei tur a ni. A bik takin Sawrkar leh Company hnuaia Agent leh Distributor leh damdawi zuar ten an zawm ngei tur a ni.

ix) Repairing Shop-in an siamthat loh te, thil siam tura order te leh contract/ theka a In saktir te, inremna ang a an tih loh in The Consumer Protection Act, 2019 hian a huam vek a ni. A siamtu hnen atangin Receipt lak hi consumer te chanvo a ni.

x) Dark Patterns: Tun laiin inbumna chi hrang hrang- "The Guidelines for Prevention and Regulations of Dark Pattern, 2023" in a sawi angin Digital Platform leh user interface hmang leh video call leh Youtube hmang te a thil zawrh fakmawina, trick leh mi hruaisual thei a tam hle a, hetiang anga consumer te bumna chi hrang hrang 13 zet Dark Patterns chu tarlan a ni. Hengah te hian Consumer-te fimkhur a ngai hle

Consumer Commission Thubuai Chinfel Theih Chin (Jurisdiction)

* District Commission-ah cheng nuai 50 thieng.

* State Commission-ah cheng nuai 50 aia tam - cheng nuai 200 thleng.

* National Commission, New Delhi-ah cheng nuai 200 aia tam a nih in.

Consumer Commission in a Judgement and Order (thuthlukna) a siam te hi Supreme Court chauh lo chuan a ti danglam thei lo.

Complaint siam dan tur

Complain hi uluk taka ziak emaw computer a print out in copy 3 thehluh tura ni. Copy khat mahni a kawl ve tur. Tin lehkha thehluhah hian lungawilohna chungchang kaihhnawih document leh receipt etc te thil tel vek tura ni. President, Distrct Commission emaw Sate Commission address mai tur a ni.

Tin, online in e-jagriti.gov.in ah a thawn theih bawk a, Common Service Centre aṭangin emaw mahni in emaw complain chu thawn mai tur a ni. A copy print a kawl kawl ve a tha.