4369/2024-2025

Champhai, 21st February 2025: Mizoram Cooperative Apex Bank (MCAB) chuan Primary Agriculture Credit Society (PACS) ding thar te tan Exposure Visit a buatsaih a. Exposure Visit senso hi NABARD-in tum sakin, PACS ding thar te hian Vaphai PACS leh Champhai Large Area Multipurpose Society (LAMP) te an tlawh a ni.

Exposure Visit hian February ni 18 aṭanga ni 21 thleng a awh a. He hunah hian Mizoram hmun hrang hranga PACS 13 aiawh mi 22 an tel a ni.

February ni 19 khan Vaphai PACS tlawhin Vaphai PACS member-te nen inkawmhona neiin an hmalakna hrang hrang - nihawi chinna leilet, Godown, Animal Feed Processing Plant -te tlawhin hun an hmang a. Vawiiin khan Champhai LAMPS rawn tlawh leh in Champhai LAMPS office-ah inkawmhona neiin, Pi Lalhmachhuani, DDM NABARD leh Pu Lalchhuanawma, Manager, Apex Bank, Champhai ten PACS te hriattur pawimawh an sawi a. LAMPS hmalakna hmun motor silna, Godown leh ran chaw herna te an tlawh bawk a ni.

Exposure Visit hi Apex Bank Head Office Aizawl atangin Immanuel Lalpianfeli, Resource Person, PDC in kaihruaiin, Pu B. Lalremliana, Director MCAB Ltd.  Leh Pu C Lalhmunliana Director MCAB Ltd. ten an ho a. He programme kaltlang hian Mizoram chhunga PACS/Society ding thar ten thil thar tam tak zir chhuakin hlawhtling taka hman a ni.