Vawiin khan Mizoram Diploma Engineers’ Service Association (MDESA) chuan an pawl khawmpui vawi 40-na Art & Culture Auditorium Berawtlang ah an hmang a; Parliamentary Secretary Pu K.S. Thanga’n a hmanpui.

Pu K.S.Thanga chuan MDESA member te chu ram hmasawnna atana hnathawktu tangkai ber te zing ami an nih thu hrilh in Mizoram tana an thiamna te thahnem ngai lehzuala hmang turin a fuih a. Mizoram chu Pathianin kristianna hmangin min hung hrang a, chuvangin rinawmna taimakna leh inpekna nen a ram neitu Engineer te hian kan ram din chhuah nan theihtawp kan chhuah tur a ni a ti.Pu K.S. Thanga hian MDESA in an service chungchanga harsatna an neih te chu sorkar dan hnuaiah a theih anga lo enfel pui a tiam a ; Association member te chu an service chungchanga an hruaitute hmalakna tawiawm tlat thin turin a chah bawk.

MDESA ah hian PWD, P& E, PHE department a thawkte an ni a an vaiin member 447 zet an awm a ni. Vawiin an pawl khawmpui ah hian association chhung inrelbawl dan thil hrang hrang an ngaihtuah a Mizoram Engineering Service Rule leh Fund Raise chungchangte pawh an ngaihtuah zingah hian a tel.