Taxation Department chuan vawiin nileng khan Mizoram Entry Tax dan thar zirhona (Workshop) hun l & PR Conference Hall ah an hmang.

He workshop hi Pu K. Sanglawma, Commissioner of Taxes in key-note address pe-in a hawng a, Co-ordinator chu Pu Kailiana Ralte, Deputy Commissioner niin zirtirna hi Pu C. Vanlalchhuana , Asst. Commissioner of Taxes leh Pu Hrangthanmawia, Superintendent of Taxes ten pe-in sawihona hun tha tak hman a nih hnu-ah Pu LH Rosanga, Joint Commissioner of Taxes in khaikhawmna hun hmangin a khar a ni.

He dan thar - Mizoram Entry Tax Act, 2015 hi April, Ni 1.2016 atangin Mizoram puma hman tur a ni a.He dan hmang hian bungraw thlan chhuah hlawm 45 te Mizorama la lut turte chuan Entry Tax 2 % emaw 4 % emaw sawrkarah an pe thin dawn a. Entry Tax hmanga chhiah lakna tur bungraw thenkhat chu khawl (Machineries) chi hrang hrang, Brick, Cement, Puanthan, insakna bungrua leh a dangte an ni a, mahni hman tur leh hralh leh chhawn tura heng bungraw chi hrang la lut turte chuan Taxation Department-ah Entry Tax pe-in phalna lak thin tur a ni ang a. He dan hmanga Mizoram sawrkarin sum a hmuhte chu hmasawnna ruhrel (Infrastructure Development) atana hman tur a ni ang.

Pu K.Sanglawma chuan Taxation Officer kalkhawmte chu an mawhphurhna hre thar leh a, an awmna District a an office theuh luahlum a, sawrkar a lut tur Revenue lakkhawmna kawngah theihtawp chhuah turin a chah bawk.