Vawiin, September 11, 2013 hian First Mizoram Finance Commission chuan Aijal Club Conference Hall-ah Mizoram Sorkar sum dinhmun zirchiangin Seminar an nei a. Pu Van Hela Pachuau, IAS(Rtd) kaihhruaina hnuaiah Resource Person, Prof Vanlalchhawna, Deptt of Economics, Mizoram University paper buatsaih chu zir ho a ni. He Seminar-ah hian Mizoram University leh Aizawl-a College hrang hrang atanga Public Finance lama mithiamte, Mizoram Sorkar-a Finance Department, Planning Department, Taxation, UD & PA, PHE leh P&E hotute, Sorkara hna pawimawh lo chelh tawh thinte, khawtlanga pa rawn te leh Consumer Association lamte’n he seminar hi an hmanpui a ni.

Mizoram Finance Commission hmasaber hian a tih tur (Terms of Reference)-ah kum 2015, 1st April atanga kum 2020, 31st March thlenga Mizoram Sorkar-in tualchhung sorkar - Aizawl Municipal Council, Village Councils leh Autonomous District Council-te hnena sum sem dan tur leh thawhchhuah ve dan tur atan rawtna a siam dawn avangin, tunhma, tun hun leh tun hnua Mizoram sum lo hman tawh dan, hman mek dan leh hman zel dan turte zir chian hmasak hi tul a tih avangin, he seminar hi buatsaih a ni.

Heng bakah pawh hian Mizoram Finance Commission hian rawtna siam tur tam tak a nei a, chungte chu tualchhung chanchinbuah te pawh vawi tam tak a lo chhuah tawh thin a. Mithiam zawkte leh helama tui mi leh helama mi thahnemngai apiangte chu rawtna rawn thlen turin Commission chuan a sawm reng bawk a ni.