Mizoram Sokar hnuaia pharmacist pawl inhlawmkhawm Mizoram Government Pharmacist Association-te chuan ni hnih awh tur General Conference vawi 8-na chu vawiin khan I&PR Conference Hall-ah hmang tanin, he hun hi Dr. K. Ropari, Director, Health & Family Welfare Department in a hmanpui.
He huna thusawitu Khuallian Dr.K.Ropari chuan Pharmacist te pawimawhna leh dinhmun te sawiin an harsatna tawh, a hnena an lo thlente pawh sutkian a nih theih nana theih tawp chhuahpui a inhuam thu te, District Pharmacy Officer post siam chungchang, Time Bound Promotion leh Post fill-up chungchangah pawh a theih ang tawka tanlak pui a inhuam thu te a sawi a. Nau piang thihna hluar chungchang te, damdawiin ngeia nau neih that zia inzirtir a tul thu te leh, Mizoram hi hriselna kawngah Model State-a hlangkai thei turin tan lak tlan a ngai thu te Dr. K. Ropari chuan a sawi bawk.
He Conference hi Pu Lalvuana, MGPA President in kaihruaiin, an member pahnih Pu C.Thankhuma leh Pu Khamzapao te thlahna hun an hmang a. Chawhnu lamah MGPA member kalkhawm ten pawl kalphung leh inkaihhruaina dan te leh Official Agenda put luh hrang hrangte sawihovin hun an hmang bawk.
Naktuk (27 March 2014) hian MGPA Conference ni hnihna chu I&PR Conference Hall-ah neih chhunzawm leh tur niin he hunah hian hruaitu thar thlanna hun an neih dawn bakah damdawi lama mithiam (resource persons) te hnen atangin zirtirna ngaihthlak ho a ni anga, he hun hi MPGA chuan an member ten ngai pawimawh turin a ngen a ni.
