Vawiin chawhma khan Aijal Club-ah Sustainable Urban Development tih thupui hmangin Smart Cities Workshop buatsaih a ni a. Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chuan workshop hawnna thuchah a sawi a ni. 

Lt. Gen. Nirbhay Sharma chuan Smart Cities chu thil pawimawh leh kan hun tawng mek nena inrem tak, Mizoram mai nilo India ram tana pawimawh tak a nih thu a sawi a. Aizawl Smart City zinga a tel theih nana state leh central sawrkar te hmalakna chu a fak a, Governor chuan project hlawhtling nan a nghawng mipuite an tel a pawimawh a ti. Himalaya tlangrama cheng mipuite chu thingtlang atangin khawpui lamah eizawnna tha zawk zawngin an pem lut zel a, rualkhai zawka thingtlang leh khawpui te kan tihhmasawn loh chuan, khawpuia hmanrua (resource) kan neih ten min daih dawn lo a ni, a ti. Mizoram chu lirnghing natna hmuna awm a ni tih hre reng chunga master plan duang nise a ti a. Master plan chu tharlam thei ang ber, kum 50 emaw a aia rei daih tura duang turin a chah a ni. Ni zung chakna, zirna siam danglam leh thiam thil lama hmasawnna te chu smart city policy paper report buatsaih nana pawimawh a thu a sawi bawk a ni. 

Mizoram University Vice Chancellor Prof’ KRS Sambasiva Rao chuan smart city sawifiahna chu khawpui awmna hmun azira a danglam zel thu sawiin, a cheng mipuite mamawh ang zela plan duang a pawimawh thu a sawi a ni. Tui chhia leh bawhhlawh sawngbawlna, public transport changtlung zawk leh chhungkaw mamawh lam kim theihna supermarket te chu Aizawl-in mamawh nia a hriat thu a sawi a ni. 

He hawnna inkhawmah hian Dr. Amitabh Kundu, Distinguished Fellow, Research and Information System for Developing Countries, New Delhi chuan Making Indian Cities Smart: Challenges of Inclusiveness and Sustainability tih thupui hmangin keynote address a sawi a. Pu Radu Carciumaru, Resident Representative, Heidelberg Centre South Asia (HCSA) chuan workshop chhunga sawiho turte tarlangin, Dr. Rumi Aijaz, Senior Fellow, Urban Policy Research Programme, Observer Research Foundation chuan Smart Cities chungchangah thuhma a sawi a ni. 

Vawiina workhop hi Heidelberg University, Observer Research Foundation (ORF) leh School of Planning and Architecture, New Delhi leh Mizoram University, Gottingen University, Deutsche Gesellschaft für Internationale Zusammenarbeit (GIZ) leh Indo-German Chamber of Commerce (IGCC) te thawhhonaa buatsaih a ni a. Friedrich Naumann Stiftung fur die Freiheit (Freidrich Nauman Foundation for Freedom) te thlawpna a buatsaih a ni.