National Book Trust, India, Mizoram University leh Mizoram sorkara Education Department te tangkawpa buatsaih ‘Aizawl Book Fair-cum-Literary Festival’ chu vawiin khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan Govt Mizo High School Field, McDonald Hill, Zarkawt, Aizawl-ah a hawng. 

School Education Director Pu K.Lalthawmmawia kaihhruaia hawnna inkhawmah Mizoram Governor chuan mipuite rilru sukthlek leh ram hmasawnna atan lehkha chhiar tam hi thil pawimawh tak a ni a, chuvangin Aizawl-ah Book Fair-cum-Literary Festival changtlung tak buatsaih a nih theih chu a lawmawm takzet a ni, a ti a. Thu leh hla chu hnam ziarang leh chanchin phochhuahna a nih angin Mizo thuziak mite tana hun tha he Festival hian a siam sak thei a, state pawn thlenga an hming lang tur chu a vanneihthlak hle a ni, a ti. Hnam hrang hrangte inkara inpawhna leh inhriatthiamna tha zawk a awm theih nan an thu leh hla tawng danga lehlin a pawimawh a, Mizote kutchhuak thu leh hla te pawh saptawng leh hindi-ah a tam thei ang ber lehlin nise, tawng danga ziah lehkhabute pawh Mizo tawnga lehlin a, Mizo mipuiten an chhiar ve theihna turin tanlak a pawimawh thu a sawi a. Tunlai khawvelah e-learning leh e-library hmangin miten awlsam takin lehkhabu chi hrang hrang an chhiar thei tawh a, hemiah pawh hian Mizote kutchhuak lehkhabu, thu leh hla te dah thei nise a duh thu a sawi bawk. Vawiina hawn tak Book Fair-cum-Literary Festival chu zirlai leh mipui mimirin hmang tangkai turin duhsakna a hlan a; Prof. Laltluangliana Khiangte lehkhabu ziah ‘Folktales of Mizoram’ chu Mizoram Governor hian a tlangzarh nghal a ni. 

Khual zahawm Mizoram Women Commission Chairperson Pi Vanlalawmpuii Chawngthu chuan Prof.Laltluangliana Khiangte lehkhabu ziah dang ‘Zonu Cheipar-I : H.Lalngurliani leh a kutchhuak’ chu a tlangzarh.  Pi Vanlalawmpuii Chawngthu chuan social media a chak tak em avangin Mizote, a bikin thlaite, chu lehkhabu chhiar lamah an thatchhiat phah a, lehkhabu hlutna hrethar leh turin leh Mizo kutchhuak ngei thu leh hla ngaihsanna chang hre turin mipuite a chah a. Mahni hnampui ngei nupui-pasalah nei hi Mizo thu leh hla thiam miten ziak uar turin a chah bawk. 

Keynote Address sawitu Prof.Laltluangliana Khiangte chuan National Book Trust, India-in a vawi katna atan kum 2006 khan Aizawl-ah Book Fair an rawn buatsaih tawh a, kum 11 hnuah kumin hian harsatna tam tak karah Book Fair-cum Literary Festival buatsaih a ni leh thei ta chu a lawmawm takzet a ni, a ti a. Ramchhunga hnam leh sakhua  inunauna leh inpumkhatna pawimawhna kan sawi rualin hetianga thu leh hla hrang hrang Mizote chhiar phaka rawn chhawpchhuah a ni thei hi a vanneihthlak hle a, Mizo thu leh hla ziakmite tan hmasawnna rahbi pawimawh tak an rawn siamsak bawk a ni, a ti. 

Vawiina hawn tak National Book Trust bultuma ‘Aizawl Book Fair-cum Literary Festival’ hi tunkar a awh ang a; he hun chhung hian lehkhabu chi hrang hrang ma tlawm zawka hralh a nih dawn bakah Mizo thu leh hla lama mithiam leh hmingthang engemawzat mipuiten an kawm theihna hun buatsaih a ni dawn bawk a. Book Fair buatsaihtute chuan zirlai leh mipuiten an hlutsak a, a tam thei ang berin rawn chhim turin an sawm nghe nghe a ni.