No.7722/2020-2021

Mamit 8th March, 2021 : Vawiin khan Hon'ble Mizoram Governor P.S. Sreedharan Pillai chuan Mamit khawpui, Aspirational District capital a tlawh a. Luangpawl Helipad-ah District Bawrhsap leh SP te'n lo dawngsawngin Governor pual hian DC Conference Hall-ah Sawrkar Officials, Kohhran hruaitu, Khawtlang hruaitu,Tlawmngai pawl hrang hrang aiawhte nen inkawmna an nei.

Sawrkar Officials, Kohhran hruaitu, khawtlang hruaitu, tlawmngai pawl aiawhte hma-ah Governor P.S. Sreedharan Pillai chuan Nikum March thla-a Mamit khawpui tlawh a tum tawh hripui leng avanga a tlawh theiloh hnu kum 1 leh chanve hnu-ah Mamit khawpui tlawh theia a awm chu lawmawm a tih thu sawiin Aspirational District an nihna anga hmasawnna chungchang sawiho theia a awm chu a lawmawm hle a ni a ti. Mizoram Governor chuan Mizorama kum 1 leh a chanve a awm chhunga Mizo mipuite thinlung thatna chu fakawm a tih thu sawiin khawtlang nuna inpawhtlanna leh thawhhona chuan Mizoram a tihnawm thu a sawi a, a ram mipuite'n rim taka kan thawh a, hma kan lak chuan tun aia hlawhtlinna kan hma-ah a awm a ni a ti. 

Governor chuan Mamit District chu Mizoram-a Aspirational District awm chhun a nih anga hmasawnna tam tak hmuh chhoh mek zel niin, mipuite hriselna, zirna leh thildang tam takah hmalakna kalpui a ni a, heng hmasawnna te hi mipuite hnen thleng a, a nihna tur ang taka hnathawh a nih zel theih nan District thuneitute leh khawtlang hruaitute chu uluk taka vil turin a chah a. Aspirational District, Mamit chu hnam hrang hrang chenna kan nih avangin khawtlang inrelbawlna kawngah pawh a thalo laite siamtha a, vantlang thil enkawl leh humhalh kawngah mahni theihna zawn theuhah tan la turin a chah a ni. 

Mamit District chu thenawm state ramri hnaiha awm a nih bakah Bangladesh nena inri a awm a ni a, ram leh ram inkara thawhhona tha, inpumkhatna leh inpawh tlang taka kan awm theih nan District Officials, ramri hnaih a khaw awmte leh a bik takin ramri-a duty BSF- te chu boruak tha siam zel tura hmala turin a chah bawk.

Amah lo lawmtute hma-ah Governor chuan Mizoram chuan ei leh bar zawnna lamah hmasawnna tur tam tak kan la nei a, kan ramah hian Agriculture, Horticulture leh Tourism bakah thildang tam takah hmasawnna haichhuah tur a la awm a, hengah hian nasa zawka hma kan laka State intodelh kan nih theih nan Sawrkar thuneitute, Khawtlang hruaitu, Tlawmngai pawl hrang hrangte chu ngaihtuahna senga hmala turin a chah a. India ram Prime Minister zahawm takin "Atmanirbhar Bharat" or 'Self Reliant India' a puan angin Mizoram tan hian enge tih ve theih ka neih ti a kan ram tana theihtawpchhuah zel turin kalkhawmte a sawm a. 'Self Reliant Mizoram' nih phawt loh chuan 'Self Reliant India' a nih theih loh thu a sawi. Governor hian India ramah lung natna avangin mi tam takin nunna kan chana, hetiang enkawlna tha Mamit District-in a neilo chu pawi a tih thu sawiin Lungphuchawl (Heart Attack) avanga nunna hlu tak,  chan tur tam tak chhanchhuah an nih theih  hmalak thuai nise a duh thu a sawi. 

Dr. Lalrozama, IAS District Bawrhsap Mamit chuan Aspirational District kan nihna anga NITI Aayog atanga hmasawnna kan hmuh hrang hrangte bakah Mamit District dinhmun tarlangin Mamit District-ah hian 2011 census a lan danin mipui 86, 364 an awm mek a, Village Councils 90 awmin Village 78 leh Sub Village 10 an awm a ni. Total Household hi 17731 niin Sex Ratio hi 927 a nih bakah Literacy Rate hi 84.74% a ni bawk. Aspirational District Programme hnuaia Mamit District-in kum 2019 - 2020 chhunga sum a dawn hi Vaibelchhe 9 a nih tawh thu tarlangin heng sum dawnte atanga hmasawnna hnathawh hrang hrangte a tarlang bawk. 

Pu Shashank Jaiswal, IPS SP, Mamit pawhin Mamit District-in ram venhimna kawnga hma an lak dan a tarlang bawk a. Pu Vanlalsawta, Addl. DC, Mamit chuan lawmthu sawina a nei bawk. 

Mizoram Governor hian Kohhran hruaitu, Tlawmngai pawl leh Political Party aiawhte kawmin Mamit District-in harsatna an neihte a sawipui a. Kohhran hruaitu, Tlawmngai pawl leh Political Party aiawhte hian harsatna an neihte ziakin Mizoram Governor hnenah hian an thlen bawk a ni.