No.7754/2020-2021

Lunglei the 10th March, 2021 - Vawiin khan Mizoram Governor P.S. Sreedharan Pillai chuan Lunglei a rawn tlawh. Governor leh amah zuitute hi chawhma dar 9:25 ah khan Kawmzawl helipad-ah rawn tumin Lunglei Bawrhsap Pu Kulothungan A, Lunglei SP Pu Rex Zarzoliana Vanchhawng leh District official dangten anlo dawngsawng a. Kawmzawl helipad-ah hian 2nd Battalion MAP ten Guard of Honour an lo pe a ni.

Mizoram Governor hian Circuit House Lunglei pan nghalin Circuit House tualzawlah Lunglei District Head of Office te meeting a neihpui.

Mizoram Governor P.S. Sreedharan Pillai chuan Mizoram 2nd capital tih a hriat lar Lunglei khawpui tlawh na hun tha tak a nei thei chu lawmawm a tih thu sawiin District ti hmasawn zel tura hmalak tul te leh harsatna awmte zirchiang tur leh sawrkar hnathawkte leh khawtlanga mi pawimawhte kawm tura lo kal a nih thu a sawi a. Lunglei District mipui ten duhsak taka an lo hmuak leh an lo dawngsawng chu thinlung taka a lawm thu sawiin Mizoram chu ram nuam tak, a mi chengte pawh thinlung thianghlim tak pu mi ni a a hriat thu leh khawtlang anga lungrual taka khawsakhona leh sawrkar tawiawm tlat thinnate chu fakawm a tih thu a sawi.

Hmasawnna daih rei leh tlo nei tur chuan kawng hrang hranga kan intodelh a tul a ni tiin Governor chuan India ram Prime Minister zahawm takin "Atmanirbhar Bharat" or 'Self Reliant India' a puan angin Mizoram pawhin intodelhna kawngah tan kan lak a tul a ni, a ti a. Head of Office kalkhawmte chu District ti hmasawn tura mawhphurhna fawng vuantute an nih angin an hma zawn theuha tih tur awmte uluk leh taima taka thawk chhunzawm zel tur leh mipui hamthatna dah hmasa zel turin a chah a. Lunglei District chu international border awmna, Bangladesh ram nena ramri intawm a nih avangin District Officials, ramri hnaih a khaw awmte leh a bik takin ramri-a duty sipaite chu boruak tha siam zel tura hmala turin a chah bawk a ni.

Meeting-ah hian Lunglei Deputy Commissioner Pu Kulothungan A chuan Lunglei District chanchin, dinhmun leh hmasawnna hna kal mek te sawifiahna hun presentation a nei a. Lunglei SP Pu Rex Zarzoliana Vanchhawng pawhin Lunglei District-a dan leh thupek kenkawh chungchang leh invenhimna kalpui dan tlangpui sawifiahna hun a hmang bawk a. Inkawmhona hun pawh hman chhunzawm niin Head of Office thenkhat ten an Department hmalakna pawimawh leh harsatna neihte Governor hnenah hian anlo thlen a ni. Lunglei Additional DC Pu R. Vanrengpuia chuan lawmthu sawina hun a hmang bawk. 

Head of office-te meeting a neihpui zawhah hian Governor chuan kohhran hruaitute, NGO hruaitute leh political party-te inkawmhona hun a hmanpui a. Kohhran hruaitu, Tlawmngai pawl leh Political Party aiawhte hian harsatna an neihte ziakin Mizoram Governor hnenah hian an thlen bawk a ni.

Meeting a neih zawh hnu hian Governor leh amah zuitute chuan hnuchham enkawlna hmun Bethel Centre, Chhumliankawn an tlawh a. Bethel Centre, hi  2003 ah bul tan niin tun dinhmunah naupang 100 (mipa 54 leh hmeichhia 46) an cheng mek a. Bethel Centre Management Committee-in enkawlin thawktu mi 13 an awm mek a, heng zingah hian sawrkar laipui Ministry of Women & Child Development kaltlanga rawih Counselor pahnih, case worker pahnih leh paramedical staff pakhat an tel a ni. Bethel Centre-ah hian primary school leh middle school kalpui mek anih bakah a hmuna cheng naupangte hian puantah, puanthui, electrical wiring, mobile reparing leh thiam thil dangte zir chhuakin eizawnna ah an hmang chhunzawm chho mek a ni. 

Governor leh amah zuitute chuan Christian Hospital Serkawn an tlawh bawk a.  Christian Hospital Serkawn hi kum 1923-a din niin tun dinhmunah khum 100 a awm a. Christian Hospital Serkawn Medical Superintendent ni mek chu Dr Lalramzauva niin, doctor 11 leh staff 183 an awm a ni. Christian Hospital Serkawn hnuaiah hian Nursing school a awm bawk a ni.

Governor chuan Bethel Centre leh Christian Hospital Serkawn- a hnathawkte thawhrimna leh inpekna chu a ngaihsan thu sawiin mi harsa leh natna khirh tak tak vei te thahnemngai tak leh hmangaih taka an lo enkawl thin avangin an chungah lawmthu a sawi a. An hnathawh ropui tak avangin mi tam takin damna an chang thin a ni tiin an hahna leh an inpekna chu a thlawn lo a ni tih hre thar leh fo thin turin a chah a. An mamawhte a hnenah rawn thlen hreh lo turin a chah a ni.

Governor leh amah zuitute chu vawiin chawhnu dar 3:30 khan Aizawl panin helicopter-in an haw leh nghal a ni.