2978/2024-2025

Aizawl, the 13th November, 2024: Mizoram Governor Dr. Hari Babu Kambhampati chuan vawiin khan Ministry of Development of North Eastern Region (DONER) leh Federation of Indian Chambers of Commerce & Industry (FICCI) te tangkawp buatsaih Northeast Trade and Investment Roadshow, Park Hyatt, Hyderabad-a neih chu a hmanpui.

Mizoram Governor Dr. Hari Babu Kambhampati chuan investor kalkhawm zinga drone pilot training leh service provider-te chu Mizoram Sawrkar nena thawkduna Agriculture leh pawimawh danga drone hman dan inzirtirna buatsaih tura a sawm bakah, technology lama theihna sang tak nei Mizo thalaite chhawr tangkai an nih theih nan IT company leh skill development provider-te chu hun remchang siam sak turin a sawm bawk a. North East India chu ram leilung hausa leh theihna sang tak nei a nih thu sawiin, Industrialist-te chu hei hi remchanga hmanga technology nena tangkawpa tan la turin a sawm a. Mau tamna North East State-ah Ethanol siam chhuah chu investment tihna remchang tak a nih thu pawh tarlangin, Sawrkar laipuiin North East hmasawnna ngaipawimawha theihtawp a chhuah thu leh hmasawnna hrang hrangte a thlen mek bakah ram ralmuang tak a nih chhoh zel thu a sawi bawk. 

Dr. Hari Babu Kambhampati chuan North East State inkalpawhna tichangtlun turin Kaladan Multi Modal Transit Transport Project (KMMTTP) siam mek a nih thu leh zawhfel a nih hnuah chuan danglamna thlentu leh tangkai taka hman a nih dawn thu sawiin, inkalpawhna leh inbiakpawhna kawnga hmasawnna hian industrialist-te tan sumdawnna kawng awlsam tak a siam a ni, a ti a. Tunhnaiah NE India-ah inkalpawhna kawngpui km 3000 chuang siam zawhfel a nih tawh thute, kum 3 chhungin km 10,000 siam leh tum a nih bakah project 400 vel bawr, cheng vaibelchhe nuaikhat dawn thawh mek a nih thute a tarlang a. Tunhnai kum 8 chhungin chhungin Air traffic 113% a a pun thu leh Airport thar 8 a awm belh thute, waterways 17 a awm belh thute bakah Rail kawng km 400 dawn siam a nih thu leh Aizawl khawpui chu nakumah railway line-a thlunzawm hman tum a nih thu a sawi bawk. 

Vawiin hun hmanah hian Pi Monalisa Dash, Joint Secretary, DONER chuan 'Advantage Northeast, opportunities for Investment & Trade' tih thupui a sawizau a. UNNATI Scheme chunchang zirhona neih a nih bakah DONER changtu Minister of State Dr. Sukanta Majumdar leh Secretary Pu Chanchal Kumar te'n thu an sawi hnuah North East State hrang hrangte'n presentation neiin investment lama theihna an neihte an sawifiah a ni. 

He hunah hian Mizoram atangin Pu Lalramsanga Sailo, Secretary, Sports & Youth Services, Pi Pinky Zosangpuii, Jt. Secretary, Commerce & Industries; Pi Chingthanmawii, Adviser cum Jt. Secratary, Planning & Programme Implementation leh Official dangte an tel a ni.