Hindustan Club, Aizawl Mizoram buatsaihin vawiin nileng khan Vanapa Hall-ah Rabindranath Tagore-a pianchampha vawi 150-na (Rabindra Janmotsav 2010-11) lawmna peng pakhat atan Cultural Programme (Gitanjali) hman a ni a, Mizoram Governor Pu M.M.Lakhera, PVSM,  AVSM, VSM chu khuallian niin, Pu Lal Thanzara, MLA, Parliamentary Secretary chu khualzahawm a ni.

Khuallian Mizoram Governor Pu Lakhera chuan Rabindranath Tagore-a chu hla phuahthiam ani satliah mai lova, India ram tana hmathlir (vision) thui tak neitu leh India ram hausakna hrechiangtu, ram leh hnam hnangaihtu dik tak anih thu sawiin, India rama hnam hrang hrang zia (culture) an zepui theuh hloh si lova thlunkhawm duhtu a ni a ti a, a puala cultural programme buatsaih ani chu lawmawm a tih thu sawiin hei hian thangtharte rilruah India ram rohlu leh ropui ziate tinung thar se a duh thu a sawi bawk. Governor chuan tunlai khawvel hmasawnna thang chho zel karah hian India ramin tun hma a a thil ropui tak tak alo tih khawvel zawng zawngin an ngaihhlut thin chu hlamchhiahin a awm mai bakah kan theihnghilh zota ni a sawiin a rilru nat thu a sawi a, India ram awp tuten kan culture ropui leh hlu tak min nuai bo sak an tumna hi kan tihlawhchham tur a ni tiin kalkhawmte chu mahni phak ang tawk tawk a India hausakna leh ropuina chawinunga khawvel ngaihsan tura chhawpchhuak leh tura tan la turin a fuih bawk a ni.

Governor chuan India ram chhunga hnam leh sakhaw chi hrang hrang kan awm hi India ram tihlu zualtu anih thu sawiin inngeih tlang taka kan awm dial dial a pawimawha, hnam leh sakhaw hrangbhrang kalphung leh tihdante kan inzahtawn sak a, kan inchawimawi tawn thiam a pawimawh a ni a ti a, MZU in Tagore-a kutchhuak ropui ber "Gitanjali" mizo tawnga let tura hma a la chu lawmawm a tih thu a sawi bawk.

Thusawitu dang Khualzahawm Pu Lal Thanzara, MLA, Parliamentary Secretary chuan Rabindranath Tagore-a hnathawh a ngaihsan thu sawiin, a hnathawhte hian tlukpuitu a nei lo a ni a ti a, Tagore a chu sakhaw zalenna ngaihlu tu leh tlang mite ngaina tu anih thu sawiin, a kutchhuak tam tak chu tlang mite behchhana a siam anih thu a sawi a, Tagore-a te ang miropui hi chu tute ta bik mah a ni lova, mi zawng zawng ta a ni a ti bawk.

Rabindranath Tagore-a hi kum 1861 May ni 7 a piang niin 1941 August ni 7 khan a boral a, a pianchampha vawi 150 na hi khawvel hmun hrang hrangah ropui taka lawm tura ruahman niin kum tluanin programme chi hrang hrang siam a ni.

Vawiin cultural programme ah hian Mizoram chhung leh pawn atang artiste thahnem tak an tel a, heng artiste te hi khualzahawm Pu Lal Thanzara, Parliamentary Secretary-in thilpek hlanin Governir hian Hindustan Club-in Tagore a pianchhampha lawmna puala sikul naupangte intihsiakna an buatsaih recitation (English leh Bengali) a category hrang hranga lawmman dawngtute bakah, Inter School Quiz Competition a titha zualte leh Hindustan Club member HSLC leh HSSLC Exam a Distinction a pass ho hnenah lawmpuina trophy leh citation a hlan bawk a ni.