2414/2024-2025

Aizawl dated 7th October 2024: Vawiin chawhnu khan Mizoram Governor Pu Indra Sena Reddy Nallu chuan Raj Bhavan-ah Solid Waste Management Centre, Tuirial enkawltu Sawrkar department hrang hrang hotute a kawm a. He hun ah hian Pi Sangchhin Chinzah, Secretary, Health & Family Welfare Department, Pu Lalmalsawma Pachuau, Secretary, Urban Development & Poverty Alleviation Department, Pu Joseph H.Lalramsanga, Municipal Commissioner, Er. Lalhriatpuia, Aizawl Deputy Commissioner, Pu C.C Lalchuangkima, CEO, Aizawl Smart City, Pu C.Lalduhawma, Member Secretary, Mizoram Pollution Control Board leh thawktu dangte an tel a ni.

Mizoram Governor Pu Indra Sena Reddy Nallu chuan hmasawnna kawng zawh tur chuan mahni dinhmun hriat chian hmasak a pawimawh thu sawiin Aizawl hi khawpui fai tak a siam tur chuan bawlhhlawh kan sawngbawlna hmun dinhmun hriat chian a pawimawh thu a tarlang a. Chumi tur chuan thawktuten an tlawh tam a tul thu leh kan dinhmun ang ang kan pawm hmasak a pawimawh thu a sawi. Governor chuan Solid Waste Management Centre, Tuirial chu Aizawl leh a chhehvel khaw hrang hrang tan a faina kawng a hmasawnna thlentu a nih ngei theih nan a chhung a awmsa, bawlhhlawh sawngbawlna khawl hrang hrangte hnathawk thei a siam a pawimawh thu a sawi a. Mipuiin sawt zawk a an hman tangkai theih nan a enkawltu department hrang hrangte an thawhho that a pawimawh thu a sawi bawk a ni.

Thutkhawmnaah hian Solid Waste Management Centre, Tuirial a Bio- medical Waste Management Centre kalpui dan tur te, Vermi-compost Unit awmze nei zawk a kalpui dan tur te leh khawtlang hruaitute kaltlang a chhungkaw tinah bawlhhlawh thliar hran inzirtirna kalpui dan tur te sawi ho a ni.

Solid Waste Management Centre Tuirial hi Urban Development and Poverty Alleviation department hnuai a State Investment Programme Management and Implementation Unit (SIPMIU) hmalakna a North East Capital Cities Development Implementation Programme (NERCCDIP) hmang a sak niin kum 2019 khan hawn a ni a, kum 2022 khan AMC kutah hlan a ni. 

AMC tarlan danin Aizawl khawpui chhunga hnawm sakhat te Pathianni tih loh kar tluan a phurh luh a sawngbawl thin a ni a, hemi tur hian AMC chuan thawktu 35 a ruai a ni. Nitin hnawm paih truck 190 velte'n bawlhhlawh Ton 119.42 vel zet SWMC Tuirialah hian an chhung khawm thin a; heng zing a Ton 89.09 hi bawlhhlawh tawihthei (wet waste) niin, adang Ton 30.33 hi bawlhhlawh tawih thei lo (dry waste) a ni. Hengte hi sawngbawl niin, nitin dry waste Ton 7.98 vel hi hmannawn (recycle) leh theih turin AMC pawmpui scrap dealer 11 te hnen ah hralh thin a ni a, wet waste-te hi Mechanical Compost Plant hmangin kumin March thla atang khan leitha ah chantir zel an ni.