Mizoram Journalists’ Association Aizawl-a General Conference hmang mekte chuan vawiin khan Raj Bhawan tlawhin Raj Bhawan Durbar Hall-ah Mizoram Governor Lt. Gen. Nirbhay Sharma, PVSM, UYSM, AVSM, VSM, (Retd) nen inkawmna hun an hmang a. Tun hi Mizoram state hotulu ber Governor leh Mizoram district 8 atanga MJA member-te a ruala an inhmuhna leh inkawmna hmasa ber a ni nghe nghe. 

Mizoram Larsap chuan MJA member-te hmaah thu sawiin Raj Bhawan tlawhna hun an rawn siam chu lawmawm a tih thu leh Raj Bhawan chu tu ta bik mah ni lovin Mizoram mipui zawng zawngte ta a ni a, Mizoram leh Mizote hmel lanna a nih avangin Raj Bhawan mawina leh zahawmna chhawm nun hi kan mawhphurhna theuh a ni, a ti. Ram hmasawnna leh khawtlang siamthatna kawngah chanchinthar lakhawmtute mawhphurhna leh hnathawh a pawimawh takzet a, mipuite duhdan leh an mamawhte sorkar beng tithlengtu an nih thu a sawi a. Mizoram chu state ralmuang berte zinga mi, ziak leh chhiar tamna leh khawtlang inrelbawlna nghet tak nei a ni a, chuti chung chuan kan hlawhtlin ang tur leh dinhmun kan luah tur ang kan luah zawh lohna chhan awma a hriat - nunphung dik lo, vaihlo leh ruihlo  kan la uar lutuk te a nih thu a sawi a, Mizo mipuiten nunphung hrisel zawk an zawm theih nan hrilhhretu tur ber chu MJA an ni tih sawiin nasa lehzuala tanlakho kan ngai a ni, a ti bawk. 

Thu a sawi zelnaah Larsap Pu Nirbhay Sharma chuan Peace Accord awm hnuah Mizoram chu kawng hrang hrangah thang hle mahse tawng dang thiam tawk lohna avang te leh khawvel zau zawk lakah kan tukverh kan hawn tawk lo avangte hian hmasawnna a tih thuanawp deuha a hriat thu a sawi a. Mizoram pawn atanga kan hlawkpui tur leh kan hmasawnpui tur thilte thliar thiam a, kan lakluh dan a dik chuan Mizo mipuite tan hmasawnna a ni thei ang a, chutiang bawkin Mizo nunze mawi leh kan hnam ziarang te, kan thiamna leh kan Mizo themthiamthilte pawh ram zau zawkah kan phochhuah thiam a tul a ni, a ti bawk. 

MJA Gen Hqrs President Pu Vanlalrema Vantawl pawhin thu sawiin Mizoram chanchina a hmasa ber atan district zawng zawnga an member ten Mizoram Governor chu a chenna hmunah rawn hmuhin inkawmna hun tha tak a buatsaih sak avangin lawmthu a sawi a. Mizoram mipuite thatna tur kawng hrang hrang Governor-in a sawichhuah thinte chuan Mizote a hmangaihzia leh Mizoram hmasawnna tur a ngaihtuah takzet a ni tih a tarlang bawk, a ti. 

Vawiina MJA te nen an inkawmna hunah hian Mizoram Governor hi a nupui Pi Jyotsna Sharma bakah Secretary to Governor leh I&PR Secretary ni bawk Pu Biaktluanga; I&PR Director Pi Lalnithangi leh I&PR Jt. Director Pi Lallianpuii ten an tawiawm a. Inkawmna hun an neih zawhah MJA member-te hian Raj Bhawan building thar te, Heritage building sakthat mek lai te leh Raj Bhawan campus chhung an tlawh kual a ni.