Vawiin tlai ah khan Raj Bhavan ah Governor Lt.Gen(Rtd.) Nirbhay Sharma leh Mizoram rawn tlawhtu, Dr.Raghuram Ranjan, Governor, Reserve Bank of India te chu an inkawm a. RBI Governor hi Deputy Governor 4 – Pu H.R. Khan, Pu R.Gandhi, Dr. Urjit R. Patel, Pu S.S. Mundra, RBI Director 3 – Pu Nachiket M. Mor, Pu Y.C. Deveshwar, Prof. Damodar Acharya bakah Pu S.S. Barik, Regional Director, RBI, Guwahati, Pi. Mary Deng, DMG/OIC, RBI, Aizawl leh Pu Vivek Aggarwal, EA to Governor, RBI ten an rawn zui a ni.

Governor Lt.Gen(Rtd.) Nirbhay Sharma chuan Dr. Raghuram Ranjan chu lo lawm in India tana a hnathawh nasat zia te vantlang hriat a nih thu leh midang te tana entawn tlak a nih thu a lo hrilh a. Mizoram hmasawnna tura sawrkar hmachhawp te lo hriattir in Bank hrang hrang te thawhpuina a pawimawh dawn hle thu a sawi a. He hmachhawp ah te hian RBI puih mamawhna tam tak a awm ngei a rin thu a lo hrilh a ni. Mizoram Governor chuan Mizoram tan skill development, Food processing leh Eco Tourism ah hmabak eng tak a awm tih RBI Governor leh a thawhpui te hriat ah a tarlang a. India hmarchhak International ramri pawimawh lai taka awm a nih avangin Act East Policy tan hmun pawimawh tak a nii a, Mizoram tih hmasawn hi thil pawimawh hmasa nia a hriat thu pawh a sawi a. Sumdawng te tana bul rawn tan nan hmun him leh ralmuang ber state a ni a ti. Mizoram chhungah Rural Bank leh Mizoram a din Bank tlem te titha an awm laiin Commercial Bank tam zawk ten an mipui hnen atanga sum an lakluh nasat angin loan pekchhuak leh mipui te tan an inhawng zau tawk lo deuh ni in mipui ten an ngai a ni tih sawiin RBI inrawlh se a duh thu RBI hotute hi a lo hrilh a ni.

RBI Governor Dr. Raghuram Ranjan chuan RBI pawmpui loh financial institutions lakah fimkhur mipui te tan a ngai a, a pung sang uchuak pe thei nazawng dawr mai lova an chanchin hriatchian hmasak a that thu sawiin zirtirna pawh tam zawk kalpui a nih tur thu a sawi . Bank hrang hrang te mipui leh sumdawng ten an chhawr tangkai zawkna turin RBI pawh in ruahhman thar tha tak tak a buaipui mek zel a ni a ti a. Bank te pawh tun aia an inhawn zau zawk theih nan RBI chuan ngaihtuahna a seng mek a, Bank te ti phur turin mipui leh NGO’s te pawh in defaulter an lo tlem zawk nan thahnem ngai se a lawmawm hle ang a ti a. Hmarchhak biala banking sector leh tualchhung mi ten inlaichinna tha zawk an neih theih nan Bank Recruitment Exam ah pawh tualchhung mite duhsak zawkna tura ruahmanna siam mek anih thu a tarlang bawk a ni.