Vawiin ah khan Bhaidas Hall, Juhu, Vile Parle West, Mumbai ah Shri JJT University chuan 3rd Special Convocation hmang in he hun ah hian lehkha zirmi te tana Degree neih theih zinga a sang ber anga chhal, Doctor of Letters (D.Litt.) Degree (Honoris causa) chu Mizoram Governor Lt Gen Nirbhay Sharma (Retd) hnenah hlan a ni.

India ram leh a mipui te tana hna a lo thawh tawh te ngaihhlutsak a, D.Litt. Degree pek a ni chu thinlung taka lawmawm a tih thu Mizoram Governor Lt.Gen. Nirbhay Sharma (Retd.) chuan a sawi a. Sawrkar leh mipui te tan kum 50 zet hun a hman chhungin buaina te, remna te, hmasawnna te, indonna leh thil dang tam tak a hmuh tawh thu a sawi a. India tana hun chhinchhiah thlak tam tak a tawn tawh thu leh a mit ngeiin alo hmuh thin thu a tarlang a. Tun hun erawh chu 'India Hun' a ni tawh tiin hun rei lote ah India chuan a phu tawk dinhmun pawimawh tak khawvel ram dang te zingah a luah thuai dawn a, chu mi atan chuan India hi a insiam rem mup mup mek a ni a ti.

A sawi zel na ah Governor chuan, "India ram tana hun lawmawm rawn inher chhuak mekah hian Hmarchhak mite leh a bik in Mizoram thalai te hi an zuan luh a ngai a, an tan hun remchang buatsaih sak an phu a ni", a ti a. India thalai zingah mahni kutke a dinchhuah tum, thil thar hmuchhuak a, hmasawnna kawng buatsaihtu tam tak hmuh leh hriattur an awm chu vanneihthlak a tih thu a sawi a. Human Resources chu India chakna hnar a ni a ti. Mizo thalai zingah pawh michhuanawm leh entawntlak tam tak an awm mek tih tarlangin tun hnaiah ngei pawh Mizo pa thluak tha zet mai chu Rashtrapati Bhawan chuan Innovation Scholar atan a thlang tih a tarlang. Hmun dang ang bawkin Mizoram ah zirna chu hmasawnna hmanraw pawimawh a nih angin ngaih pawimawh a nih thu a sawi a. Zirna chuan Industry mamawh thiamna a pek chhuah a chhawrtlak mithiam a chher a tul thu sawiin chu chu nasa taka thang mek India ram in a mamawh a ni a ti a. University leh zirna insang ah te Research awmze nei leh chhawr tangkai chhunzawm theih chi uar leh ngaih pawimawh a tul tih sawiin hemi chungchang hi Mizoram University thuneitute nena inkawmna an neih chang pawh in thahnem ngai in a lo sawi chhuak thin tih a tarlang a. JJTU leh University dang te pawh Hmarchhak leh Mizoram te nen student exchange neih pui ah a sawm tih sawiin Research leh skill development chungchang ah thawhhona neih a tangkai tur thu a sawi a. Convocation chhimtu te chu, Act East Policy puitlin hun a hmun pawimawh tur, Mizoram lam hawia ngaihtuahna seng tur leh remchanna rawn zawng turin Mizoram Governor Lt Gen Nirbhay Sharma (Retd) chuan a sawm a ni.

JJTU in Mizoram Governor Lt Gen Nirbhay Sharma (Retd) an lawmpuina leh D.Litt. Degree an pekna Citation ah hian, " Shri JJT University is honoured to award “D. Litt” Degree (Honoris causa) to his Excellency Honorable Lt. Gen. Nirbhya Sharma in recognition of his outstanding contribution to the service of our motherland, exemplary patriotism, inspirational leadership and peacemaking initiatives in our special convocation held at Mumbai on 4th May 2016.." tih a in ziak a.

Convocation programme hi Chancellor, Dr. Vinod Tibrewala, Vice Chancellor, Dr. Avinash Mehta leh Dr. V.S. Valecha, Director of Education te chuan kaihruaiin Pu Ram NareshYadav, Governor of Madhya Pradesh, Pu Tathagatha Roy, Governor of Tripura, Pu Kaptan Singh Solanki, Governor of Haryana, Pu J.P. Rajkhowa, Governor of Arunachal Pradesh, Dr. Jagannath Pahadia, Former Governor of Haryana, Dr. Gen. J.J. Singh, Former Governor of Arunachal Pradesh, Dr. D. Y. Patil, Former Governor of Bihar, Classical Musician Pandit Hariprasad Chaurasia, Padma Vibushan Awardee leh Dr.Rupa Shah, Former Vice Chancellor of SNDT University te pawh convocation chhimtu mi pawimawh tak tak zingah an tel a ni.